Xəzərin Azərbaycan sektorunda neft hasilatı azalır.
Bu barədə “Azəri–Çıraq–Günəşli” (AÇG) layihəsinin operatoru olan BP şirkəti ilin birinci yarısının yekunlarına dair hesabatında bildirib.
Məlumata görə, AÇG blokundan gündəlik orta hesabla 327 min barrel neft hasil olunub ki, bu da 2024-cü ilin birinci yarısında qeydə alınan 336 min barrel göstəricisindən azdır.
Ümumilikdə, AÇG blokundan 2025-ci ilin yanvar-iyun aylarında 59 milyon barrel neft hasil edilib ki, bu da 2024-cü ilin eyni dövrü ilə müqayisədə 2 milyon barrel azdır.
Azalma bloka daxil olan demək olar ki, bütün sahələrdə qeydə alınıb, istisna yalnız “ACE” platformasıdır. Bu isə onunla izah olunur ki, “Azəri” yatağının mərkəzi-şərq hissəsi olan ACE 2024-cü ilin əvvəlində istismara verilib və orada hasilat artımı davam edir.
Azərbaycanın əsas qaz-kondensat yatağı olan “Şahdəniz”də isə hasilat dəyişməz qalıb – yarımillik dövrdə 14 milyard kubmetr qaz və 2 milyon ton kondensat hasil olunub. Bununla yanaşı, “Şahdəniz”in maksimal istehsal gücü 2024-cü ilin ortalarında olan 80,7 milyon kubmetrlə müqayisədə sutkada 77,2 milyon kubmetrə düşüb. 2025-ci ilin ilk yarısında “Şahdəniz”dən qaz ixracı gündəlik orta hesabla 62,4 milyon kubmetr təşkil edib, bu isə 2024-cü ilin eyni dövründəki 63,1 milyon kubmetrdən azdır.
2025-ci ildə AÇG layihəsinə artıq 817 milyon dollar xərclənib, bu isə 2024-cü ilin ilk yarısındakı 941 milyon dollardan azdır. “Şahdəniz” üzrə xərclər isə əksinə, artaraq 1,754 milyard dollara çatıb – 2024-cü ilin yanvar-iyun dövründə bu göstərici 1,658 milyard dollar təşkil edirdi. /azpolitika.info
