Azərbaycanla Ermənistan arasında sülh istiqamətində mühüm razılaşma əldə edilib. Bunun fonunda indi ən vacib mərhələ gələn il Ermənistanda keçiriləcək parlament seçkiləri ilə bağlıdır. Çox şey bu seçkilərin nəticəsindən aslıdır. Ermənistan konstitusiyasının dəyişdirilməsi digər prosesdir. Konstitusiya dəyişikliyi isə parlament seçkilərinin nəticələri ilə əlaqəlidir.
Bu sözləri açıqlamasında politoloq Fərhad Məmmədov Bakı ilə İrəvanın sülh xəttində baş verənləri şərh edərkən deyib.
“Azərbaycan tərəfi sözsüz ki, Ermənistandakı seçki prosesini diqqətlə izləyəcək. Prosesdə hansı siyasi qüvvələrin iştirak edəcəyi, proqramlarının nədən ibarət olacağı, Azərbaycanla münasibətlərdə nələrin qeyd ediləcəyi önəmlidir. Bununla Ermənistan cəmiyyətinin hansı siyasi qüvvəyə, sülhə və yaxud müharibəyə səs verdiyi bilinəcək”, – deyə o qeyd edib.
_(1).jpg)
Politoloqun fikrincə, Ermənistanın Baş naziri Nikol Paşinyan seçkilərdə məğlub olsa, revanşist qüvvələrin addımları növbəti münaqişəyə gətirib çıxara bilər: “Azərbaycan maksimum şəkildə bu dövr üçün prosesləri sığortalamağa çalışır. Prezident İlham Əliyev də müsahibəsində xüsusi olaraq bildirdi ki, biz təkcə Paşinyanla deyil, eyni zamanda, Ermənistanla birgə bəyanat imzalamışıq. Bu isə sözsüz ki, Ermənistan Respublikasının öhdəlikləridir. Bu xüsusda ATƏT-in Minsk Qrupunun buraxılması münaqişənin bitməsi, revanşist qüvvələr hakimiyyətə gəlsə belə, əllərindən beynəlxalq mexanizmin çıxması deməkdir”.
