İsrail ordusunun Qətərin paytaxtında HƏMAS hərəkatının rəhbərliyinin üzvlərinə zərbə endirməsi yəhudi dövlətinin və ABŞ-ın məqsədlərinə xidmət etmir.
Bu barədə Ağ Evin mətbuat katibi Karolina Levitt jurnalistlər üçün keçirdiyi növbəti brifinqdə deyib.
“Sülhə nail olmaq üçün böyük səylər göstərən və cəsarətlə risklər götürən, suveren dövlət və ABŞ-ın yaxın müttəfiqi Qətər ərazisində birtərəfli bombardmanlar nə İsrailin, nə də Amerikanın məqsədlərinə xidmət edir”, – deyə o əlavə edib.
Ağ Ev rəsmisi zərbədən sonra ABŞ Prezidenti Donald Trampın İsrailin Baş naziri Benyamin Netanyahu ilə telefon danışığı apardığını qeyd edib:
“Prezident Qətərin əmiri və baş naziri Təmim bin Həməd əs-Sani və Məhəmməd bin Əbdül Rəhman əs-Sani ilə də danışdı və onlara ölkəmizə göstərdikləri dəstəyə və dostluğa görə təşəkkür etdi. Tramp əmin etdi ki, onların torpaqlarında bir daha belə şey olmayacaq”.
