Rusiya Ukraynanın öz ərazilərində referendum keçirə bilməsi üçün sülh müqaviləsi bağlanana qədər atəşkəsə razıdır.
Bu barədə özəl məlumatları ilə tanınan nüfuzlu “Axios” nəşri xəbər yayıb.
“Axios” xəbər verir ki, Rusiya Ukraynanın məlum ərazilərlə bağlı referendum keçirməsinə imkan vermək üçün sülh razılaşması əldə olunana qədər atəşkəsə razılıq verib. Nəşr yazır ki, bir gün əvvəl ABŞ Prezidentinin elçisi Stiven Uitkoff və Donald Trampın kürəkəni Cared Kuşner Ukrayna və Rusiya nümayəndələri ilə iki ayrı söhbət aparıblar. Danışıqlarda Rusiya tərəfini Rusiya Prezidentinin köməkçisi Yuri Uşakov təmsil edib.
Hər iki ölkənin rəsmilərinin sözlərinə görə, müqavilənin əksər parametrləri, o cümlədən Ukraynanın ABŞ və Avropadan alacağı gözlənilən təhlükəsizlik zəmanətləri artıq Vaşinqton və Kiyev arasında razılaşdırılıb.
Yüksək vəzifəli ABŞ rəsmisi təsdiqləyib ki, ABŞ NATO Nizamnaməsinin 5-ci maddəsinə əsaslanan təhlükəsizlik zəmanətləri sənədini təsdiq üçün Senata göndərməyə hazırdır. Əsas maneə Rusiyanın istənilən müqavilə çərçivəsində Donbasın bütün ərazisi üzərində nəzarət tələbidir.
Bundan əlavə, “Axios”-a görə, ABŞ tərəfi müqaviləni təsdiqləmək üçün atəşkəs ideyasını dəstəkləyir, lakin bunun lojistik cəhətdən həyata keçirilməsinin çətin olacağını vurğulayır.
Mənbənin məlumatına görə, öncə yekun müqavilənin imzalanmasından əvvəl atəşkəsə qarşı çıxan Kreml referendum üçün atəşkəsə razılıq verib. Ancaq nəşrin yazdığına görə, Ukrayna 60 günlük atəşkəsdə israr etsə də, Rusiya daha qısa müddət tələb edə bilər.
