ABŞ-nin İrana qarşı müharibəyə başlamasından təxminən iki ay keçir. Bu o deməkdir ki, Donald Tramp və Konqres üzvlərinin bundan sonra nə ediləcəyi barədə qərar verməli olduqları son tarix yaxınlaşır.
“The New York Times” qəzetinin məlumatına görə, ABŞ qanunvericiliyi Prezidentin Konqresin təsdiqi olmadan 60 gündən çox müharibə aparmasını qadağan edir. Bu müddət isə mayın 1-nə qədər bitəcək. Həmin tarixdən sonra Trampın əsasən üç seçimi olacaq: Konqresdən hərbi əməliyyatları davam etdirmək üçün icazə istəmək, müharibəni bitirmək və ya qanunun qoyduğu məhdudiyyətləri aşmağa cəhd etmək.
İranın bombalanması 28 fevralda başlayıb. Həmin vaxt Tramp bəyan edib ki, o, baş komandan kimi Yaxın Şərqdəki Amerika bazalarını qorumaq və “ABŞ-nin həyati əhəmiyyətli milli maraqlarını, o cümlədən İsrail də daxil olmaqla regional müttəfiqlərin kollektiv özünümüdafiəsini” təmin etmək üçün səlahiyyətləri daxilində hərəkət edir.
Konqresdəki demokratlar artıq beş dəfə hərbi əməliyyatları dayandırmaq və Trampı qanunvericilərlə məsləhətləşməyə məcbur etmək üçün qətnamələr qəbul etməyə çalışıblar. Respublikaçılar bunların hamısını səs çoxluğundan istifadə edərək bloklayıblar. Lakin artıq respublikaçıların da bəziləri qanuni məhdudiyyətin onlar üçün vacib olduğunu açıq şəkildə bildiriblər. Respublikaçı senator Con Körtis aprelin əvvəlində bəyan edib ki, “Konqresin təsdiqi olmadan 60 günlük müddətdən sonra hərbi əməliyyatların davam etdirilməsini dəstəkləməyəcək”. Lisa Murkovski də eyni mövqedən çıxış edib.
Bir qrup senator hazırda İrana qarşı hərbi güc tətbiqinə icazə verən qətnamə hazırlayırlar, lakin bu sənədin əsas məqsədi Konqresin səlahiyyətlərini bərpa etmək və administrasiyadan aydın əməliyyat parametrlərinə riayət etməsini tələb etməkdir.
Senatda respublikaçılar cüzi səs çoxluğuna malikdirlər – 100 səsdən 53-ü. İndiyə qədər Trampa kart-blanş verən respublikaçıların cəmi bir neçə üzvü sərt mövqe tutarsa, Ağ Ev kompromis axtarmağa məcbur olacaq.
Konqres üzvləri xəbərdarlıq edir ki, münaqişə may ayına qədər davam edərsə, Tramp Konqresdəki dəstəyi itirə bilər. /azpolitika.info
