Bu gün – martın 11-də ABŞ və Ukrayna nümayəndələrinin Səudiyyə Ərəbistanının paytaxtı Ciddə şəhərində keçirdikləri 9 saatlıq danışıqlarda davamlı sülhü bərpa etmək üçün ilikin razılaşma əldə olunub.
Bu barədə danışıqların yekun bəyanatında deyilir. Bəyanat Ukrayna Prezidentinin saytında yayımlanıb.
Qeyd olunur ki, Kiyev kəşfiyyat məlumatlarının mübadiləsi də daxil olmaqla, Amerika yardımının bərpası müqabilində Rusiya ilə 30 günlük atəşkəsə razılaşıb. Zelenski deyib ki, atəşkəs təklifi əvvəllər təklif edildiyi kimi təkcə hava və dənizdə deyil, cəbhə xəttinə də aiddir.
Tərəflər həmçinin nadir torpaq metalları ilə bağlı razılaşmanın mümkün qədər tez əldə olunması barədə razılığa gəliblər.
Nümayəndə heyətləri “Ukraynanın uzunmüddətli təhlükəsizliyini təmin edəcək davamlı sülhün” yaradılması üçün danışıqlar qrupları yaratmaq və dərhal məsləhətləşmələrə başlamaq barədə də razılığa gəliblər.
Ukrayna nümayəndə heyətinə başçılıq edən Ukrayna prezident aparatının rəhbəri Andriy Yermak danışıqlardan sonra yazıb: “Birləşmiş Ştatlar Rusiyaya sülhün əldə edilməsinin açar məsələsinin sülhə qarşılıq verilməsi olduğunu çatdıracaq. Rusiya da eyni addımı atsa, Ukrayna 30 günlük atəşkəslə razılaşır. Kiyev ABŞ-nin təklifini qəbul edir”.
ABŞ dövlət katibi Marko Rubio Rusiyanın çox yaxın gələcəkdə atəşkəslə razılaşacağına ümid etdiyini bildirib.
ABŞ-nin milli təhlükəsizlik üzrə müşaviri Mayk Vals görüşdən sonra bildirib ki, Ukrayna nümayəndə heyəti münaqişəyə son qoymaq üçün konkret addımlar və təkliflər təqdim edib. O, həmçinin əlavə edib ki, yaxın günlərdə Rusiyanın nümayəndəsi ilə danışacaq.
Ağ Evin mətbuat katibi Kerolin Levitt də öz növbəsində Amerika və Ukrayna tərəfləri arasında danışıqların müsbət və konstruktiv keçdiyini bildirib.
“Nümayəndə heyətləri həmçinin atəşkəs rejimi çərçivəsində sülh prosesinin bir hissəsi kimi humanitar səylərin, o cümlədən hərbi əsirlərin mübadiləsi, saxlanılan mülki şəxslərin azad edilməsi və köçkün ukraynalı uşaqların öz vətənlərinə qaytarılmasının vacibliyini müzakirə ediblər”, – Ukrayna tərəfinin bəyanatında deyilir.
Moskva hələ ki, Ciddə görüşünə münasibət bildirməyib. Rusiyanın TASS dövlət xəbər agentliyi danışıqların yekunlaşdığını və çərşənbə günü davam etdirilməsinin gözlənildiyini bildirib.
Ukrayna Prezidenti Volodimir Zelenski sosial şəbəkədəki hesabında bildirib ki, Amerika tərəfi onların arqumentlərini başa düşür, təkliflərini qəbul edir: “Amerika Birləşmiş Ştatları Rusiyanı buna inandırmalıdır. Yəni biz razıyıq və əgər “ruslar” razılaşsa, o dəqiqə sükut qüvvəyə minəcək. Bu gün söhbətin mühüm elementi Amerikanın Ukraynaya müdafiə yardımını, o cümlədən kəşfiyyat yardımını bərpa etməyə hazır olmasıdır. Ukrayna sülhə hazırdır. Rusiya müharibəni bitirmək və ya müharibəni davam etdirmək istəyini nümayiş etdirməlidir. Tam həqiqətin vaxtıdır. Ukraynaya kömək edən hər kəsə təşəkkür edirəm”. /azpolitika.info
