Rusiya və ABŞ prezidentləri Vladimir Putin və Donald Trampın danışıqları göstərdi ki, hər iki lider müzakirə prosesində peşəkar davranır, kompromisə və qarşılıqlı güzəştə gedir.
Bu sözləri türkiyəli təhlükəsizlik eksperti Abdullah Ağar TASS-a açıqlamasında ötən gün Putin və Tramp arasında baş tutan telefon danışığını şərh edərkən deyib.
“Bu təmasların bir neçə ayrıca aspekti var. Tramp və Putin arasında aparılan bu danışıqların əsas reallığı üç ildən artıqdır davam edən müharibədir. Və burada həll üçün axtarışın özü çox vacibdir. Əgər tərəflər arasında artıq razılaşdırılmış və ya gələcəyə buraxılmış məsələlərə nəzər salsaq, bu, qlobal geosiyasi tənliyin formalaşmasında son dərəcə mühüm alətdir. Nəhayət, tərəflərin müharibənin gedişi ilə bağlı mövqelərini korrektə etmək arzusu var. Onlar xoşməramlı jestlər edir, kompromislər axtarır, şərtlərini təklif edir və güzəştə gedirlər. Bütün bunlar danışıqlar prosesində son dərəcə vacibdir. Hər iki tərəfdən – Rusiya və ABŞ-dan biz peşəkar yanaşma görürük”, – Ağar bildirib.
Ekspert Putinlə Trampın danışıqlarda İsrailin təhlükəsizliyinə mühüm yer ayırmalarına diqqəti çəkib:
“Bu, xüsusilə İranın müzakirəsi kontekstində hiss olunur. Putin və Trampın İranın heç vaxt İsrail üçün dağıdıcı problem olmaması ilə bağlı məsələyə ümumi yanaşmasını ortaya qoyması regiondakı mübarizəyə böyük təsir göstərəcək. Bu, Yaxın Şərq üçün ciddi aspektdir”./axar.az
