Donald Tramp və onun administrasiyası Ukraynadakı müharibəni Kiyevə qarşı amansız təzyiqlərlə, Rusiyanın isə “nazı ilə oynamaqla” dayandıra bilməyəcəyini anlamağa başlayır. Vladimir Putin və ətrafının ABŞ-nin atəşkəs təklifini qulaqardına vurduğu, vaxt uzatmağa çalışdığı açıq görünür və bunu artıq Tramp özü də dilə gətirməyə başlayır.
“Reuters”-in Trampın çevrəsindəki iki yüksək rütbəli məmura istinadla yaydığı məlumata görə, ABŞ administrasiyası artıq yaxın aylarda Ukraynada atəşkəsin əldə olunacağına inanmır.
Agentlik öz mənbələrindən öyrənib ki, son günlər Tramp administrasiyasının yüksək rütbəli üzvləri ABŞ-nin çətin ki, tezliklə Ukraynada sülh razılaşmasına nail ola biləcəyini düşünür. Bu səbəbdən onlar Kiyev və Moskvaya təzyiq göstərmək üçün yeni strategiyalar hazırlayırlar.
Nəşr qeyd edir ki, ikinci prezidentlik müddətinin əvvəlində Tramp və müşavirləri aprel və ya may aylarına qədər Ukraynada tam atəşkəsə və sonrakı aylarda davamlı sülhə nail olmaq niyyətində idilər. Lakin ABŞ rəsmilərinin fikrincə, bu məqsədlərdən heç biri hələ ki, reallaşa bilməz. Bu da öz növbəsində müharibənin uzun sürməsi riskini və Ukraynanın hərbi əməliyyatları üçün Qərbin əlavə dəstəyinə ehtiyacı artırır.
Rəsmilərin dediyinə görə, razılaşma o qədər də real görünmür və bu, üç illik müharibənin uzanacağı, Ukraynanın daha çox Qərb dəstəyinə ehtiyacının yaranacağı ehtimalını çoxaldır: “Yüksək rütbəli ABŞ rəsmiləri həftələrdir ki, Kiyevin danışıqları necə aparmasından, Vaşinqtonla faydalı qazıntılar üzrə razılaşmaya və sülh danışıqlarının irəliləməsinə müqavimət göstərməsindən şikayət edirdilər. Lakin son günlər rəsmilər daha çox Moskvanın davranışlarından məyus olurlar”.
Nəşr əlavə edir ki, həftəsonu keçirilmiş bir sıra danışıqlardan sonra Ağ Ev və Dövlət Departamentinin rəsmiləri etiraf ediblər ki, Vladimir Putin Vaşinqtonun uzunmüddətli sülh razılaşması əldə etmək səylərinə fəal şəkildə qarşı çıxır. Ona görə də onlar Rusiyanı razılaşmaya sövq etmək üçün iqtisadi və diplomatik təzyiqləri müzakirə edirlər: “Tramp həftələrdir deyirdi ki, Rusiya hökmdarına güvənir və onun sülhə sadiq olduğuna inanır. Lakin son günlər Ağ Ev Putinin niyyətlərindən ehtiyatlanmağa başlayıb. Baxmayaraq ki, hətta Tramp hələ də Putinin sülh istədiyinə inandığını nümayiş etdirməkdə davam edir. Tramp administrasiyasının Moskvaya təzyiq etmək üçün konkret hansı planları ola biləcəyi bəlli deyil, lakin yüksək rütbəli ABŞ rəsmilərindən biri Ağ Evin Rusiyaya tətbiq edə biləcəyi əlavə tariflər və sanksiyaları nəzərdən keçirdiyini bildirib”.
Nəşr onu da qeyd edir ki, Rusiya Xarici İşlər nazirinin müavini Sergey Ryabkov çərşənbə axşamı dərc olunmuş müsahibəsində deyib ki, Moskva ABŞ-nin müharibəni indiki formada bitirmək təkliflərini qəbul edə bilməz, çünki onlar “Kremlin müharibənin başlamasına səbəb olan məsələləri” həll etmirlər. Yəni, Moskva əvvəlki tələblərində qalır və Ukraynanın suveren dövlət kimi mövcudluğuna son qoyulmasında israrlıdır. Bu isə təbii olaraq, atəşkəs danışıqlarını və sülh perspektivini dalana dirəyir.
Xatırladaq ki, bundan öncə Tramp Vladimir Putinin Ukraynada atəşkəs sazişi bağlamaq istədiyinə inandığını desə də, əlavə edib ki, Rusiyaya bununla razılaşmaq üçün “psixoloji müddət” qoyub. Bazar günü isə Tramp “NBC News” telekanalına deyib ki, o, Ukraynada BMT-nin nəzarəti altında müvəqqəti idarəçiliyin tətbiq olunmasını təklif etdiyinə görə Putinə qarşı “çox qəzəbli”dir. O, həmçinin danışıqlar masasına oturub Ukraynada döyüşləri dayandırmasa, Rusiya neftinə və ondan neft alanlara qarşı əlavə sanksiyalar tətbiq edəcəyi ilə hədələyib.
Həmçinin, Tramp bu həftə Putinlə Ukrayna məsələsini yenidən müzakirə edəcəklərini açıqlayıb.
Bu arada Finlandiya Prezidenti Aleksander Stubb Floridada Trampla görüşdən sonra Rusiyaya qarşı yeni tədbirlər görülməzdən əvvəl hərbi əməliyyatların dayandırılmasına razılıq verməsi üçün Moskvaya aprelin 20-nə kimi vaxt verməyi təklif edib. Lakin hadisələrin gedişi onu göstərir ki, real atəşkəsə nəinki aprelin 20-nə qədər, ümumiyətlə, yaxın aylarda nail olunması ehtimalı və ümidləri getdikcə daha sürətlə tükənməyə başlayır… /azpolitika.info
