Hesablama Palatasının apardığı audit Kür-Araz ovalığında kollektor-drenaj sistemlərinin və suvarılan torpaqların vəziyyətində ciddi nöqsanları üzə çıxarıb.
Bu barədə Hesablama Palatasının bülleteninin 2024-cü il üzrə dördüncü nömrəsində bildirilir.
Auditin nəticələrinə əsasən, son beş ildə bölgədə zəif, orta və güclü dərəcədə şorlaşmış torpaqların xüsusi çəkisi artaraq, 2024-cü ildə müvafiq olaraq 34,1 %-ə, 29,1 %-ə və 24,4 %-ə çatıb.
Kollektor-drenaj sistemlərinin bərpası əsasən yeni əkin sahələrinə yönəldilib. Lakin əvvəllər istifadə olunan, lakin şorlaşma səbəbindən dövriyyədən çıxmış torpaqlarda vəziyyətə lazımi müdaxilə olunmayıb.
Dren-kollektorların qeyri-effektiv istismarı, kollektor sularının təkrar istifadəsi və duzsuzlaşdırılmadan torpaqlara verilməsi, torpaqların yenidən şorlaşmasına səbəb olub. Eyni zamanda, çirkab suların kollektorlara axıdılması və oradan şirin su hövzələrinə yönləndirilməsi ciddi ekoloji və sanitariya riskləri yaradıb.
Audit həmçinin sahibsiz kollektorlar, qeyri-dəqiq uçot, normativ yanaşmaların olmaması, lil təmizləmə işlərinin plansız aparılması və mövcud istismar imkanlarından tam istifadə olunmaması kimi bir sıra sistemli nöqsanları da qeyd edir.
“Sabirabad və Salyan rayonlarında qış otlaqlarında suvarma və drenaj obyektlərinin tikintisi” layihəsi çərçivəsində ayrılmış 27,8 milyon manatlıq vəsaitin yalnız bir hissəsi üzrə effektiv nəticələr əldə olunub. Eyni zamanda, Kür çayının səviyyəsinin aşağı düşməsi səbəbindən nasos stansiyasının dayanıqlı fəaliyyəti təmin edilməyib.
Hesabatda strateji yanaşmanın olmaması, fəaliyyətin resurslara uyğun planlaşdırılmaması, inzibati nəzarətin zəifliyi və nəticə etibarilə dövlət vəsaitlərinin səmərəsiz xərclənməsi xüsusi vurğulanır.
