Türkiyə Prezidenti: “Hər cür ssenariyə qarşı hazırlıqlarımızı tamamlamışıq”
“Netanyahu zalim Hitleri çoxdan geridə qoyub”
Türkiyə Prezidenti Rəcəb Tayyib Ərdoğan, İsrail–İran qarşıdurmasının daha da dərinləşdiyi bir vaxtda, hakim Ədalət və İnkişaf Partiyasının (AK Parti) parlament qrupunun toplantısında mühüm və sərt bəyanatlarla çıxış edib. Ərdoğanın çıxışı həm regiondakı müharibə təhlükəsinə, həm də Türkiyənin milli maraqlarına dair qəti mövqeyini əks etdirib.
Ərdoğan İsrailin son hərbi əməliyyatlarını açıq şəkildə tənqid edərək bildirib: “İsrail suiqəst və hücumlarla haydutluq sərhədini aşdı.”
Onun sözlərinə görə, İsrailin bu davranışı təkcə Qəzza ilə məhdudlaşmır, eyni zamanda Suriya və İran kimi qonşu ölkələrə qarşı da açıq dövlət terroruna çevrilib.
“İranın bu haydutluğa və dövlət terroruna cavab verməsi tamamilə qanuni, hüquqi və təbii bir hüquqdur. İsrail isə nəticələri gözləmədən və müzakirələri nəzərə almadan açıq-aşkar terror aktı həyata keçirmişdir,” – deyə Ərdoğan vurğulayıb.
Prezidentin ən sərt bəyanatlarından biri isə Qəzzadakı vəziyyətlə bağlı olub. Ərdoğan qeyd edib ki, artıq 620 gündür davam edən Qəzza müharibəsi soyqırım səviyyəsinə çatıb və: “Netanyahu zalim Hitleri çoxdan geridə qoyub.”
Onun sözlərinə görə, Avropadakı Holokost dövründə belə bu səviyyədə insanlıqdan kənar mənzərələr yaşanmamışdı.
Türkiyə lideri xəbərdarlıq edib ki, müharibənin alovu sürətlə bütün bölgəyə yayılır və Ankara bu prosesi yaxından izləyir: “Bütün qurumlarımız hazır vəziyyətdədir. İran istiqamətindəki terror aktlarını diqqətlə izləyirik. Hər cür ssenariyə qarşı hazırlıqlarımızı tamamlamışıq. Millətimiz rahat olsun – hökumət milli maraqlarımızın və təhlükəsizliyimizin daimi təminatçısıdır.”
Ərdoğan bəyan edib ki, Türkiyə bölgədəki heç bir dövlətlə müqayisə edilə bilməz və heç kim bu ölkənin səbrini sınamamalıdır: “Kim bizi test etməyə, sınamağa cəhd edərsə, tariximizdən və əcdadımızdan miras aldığımız iradə ilə layiqli cavab alacaq. Barış istəyirik, amma barışı pozana qarşı sərt reaksiya da verəcəyik.”
O, həmçinin Türkiyənin milli müdafiə sənayesində qazandığı uğurlara toxunaraq qeyd edib ki, artıq ölkə öz hava məkanını yerli və milli sistemlərlə qoruyur.
“Əgər sülh istəyirsənsə, müharibəyə daim hazır olmalısan,” – deyə Ərdoğan bildirib və əlavə edib ki, silahlı qüvvələrin və müdafiə sənayesinin gücü daha da artırılacaq.
Türkiyə Prezidenti vurğulayıb ki, bölgədə sülh və təhlükəsizliyin təmin olunması üçün İran da daxil olmaqla bütün ölkələr bu hadisələrdən dərs çıxarmalı və İsrailə qarşı ortaq tədbirlər görməlidir. O əlavə edib ki, son iki ildə İsrailin həyata keçirdiyi aqressiv siyasət bütün bölgənin qarşılaşdığı problemlərin əsas səbəbidir.
Ərdoğan çıxışı zamanı Türkiyədə illərlə təkrarlanan hərbi çevriliş cəhdlərinin arxasında “kirli siyonist şəbəkə”**nin dayandığını da bildirib.
“FETÖ və digər xəyanət şəbəkələri ilə mübarizə, əslində siyonizmin bu torpaqlardakı uzantıları ilə mübarizədir,” – deyə o əlavə edib.
Ərdoğan çıxışını Türkiyə xalqının birlik və gücünə vurğu edərək belə yekunlaşdırıb: “Bu millət öz dövlətinin gücünü bilir. Kimsə narahat olmasın – Türkiyəyə qarşı istər içəridən, istərsə də xaricdən edilən hər hücumda onun qarşısında bu millətin özü və bizim polad iradəmiz dayanacaq.” /azpolitika.info
