Xəbər verdiyimiz kimi, İsrailin Baş naziri Binyamin Netanyahunun ofisi İranla atəşkəsin əldə olunması ilə bağlı bəyanat yayıb. Bildirilib ki, əməliyyatın məqsədlərinə nail olunduqdan sonra ABŞ Prezidenti Donald Trampla tam koordinasiya əsasında İranla ikitərəfli atəşkəsə razılıq verilib.
“İsrail atəşkəsin istənilən pozulmasına güclə cavab verəcək”, – deyə bəyanatda vurğulanıb.
Lakin bir neçə saat sonra atəşkəs pozulub. İsrail Müdafiə Ordusunun Mətbuat Xidmətinin yaydığı məlumata görə, İrandan İsrail ərazisinə yeni raket buraxılışı qeydə alınıb. Bildirilib ki, ölkənin bir sıra bölgələrində hava hücumu ilə bağlı xəbərdarlıq elan olunub. Ordu İsrailin şimal hissəsinin raket atəşinə tutulduğunu açıqlayıb.
İsrailin müdafiə naziri İsrael Kats isə baş verənlərə münasibət bildirib.
“İranın, ABŞ Prezidentinin elan etdiyi atəşkəs rejimini kobud şəkildə pozması və İsrailə doğru raketlər atması fonunda, həmçinin istənilən pozuntuya qətiyyətlə cavab vermək niyyətində olan İsrail hökumətinin siyasətinə uyğun olaraq, mən İsrail Müdafiə Qüvvələrinə baş nazirlə koordinasiyalı şəkildə Tehrana qarşı intensiv hücum əməliyyatlarını davam etdirməyi tapşırdım”, – bəyanatda qeyd olunub.
Bundan sonra, TASS-ın məlumatına görə, İran Silahlı Qüvvələrinin Baş Qərargahı İsrail ərazisinə raket zərbələrinin endirildiyinə dair məlumatları təkzib edib.
Müharibənin nəticələrini şərh edən sabiq xarici işlər naziri Tofiq Zülfüqarov bildirib ki, hərbi nəticələrə nəzər yetirdikdə bu müharibənin təkcə İsrailin deyil, bütövlükdə Qərb koalisiyasının müharibəsi olduğu aydın görünür:
“Daha geniş bir koalisiyadan danışa bilərik. Çünki ərəb ölkələri də anti-İran koalisiyasının üzvləridir. Müharibənin sonuncu mərhələsində biz gördük ki, İranın hərbi hava qüvvələri demək olar ki, iştirak etmədi. Onlar müharibəyə hazır deyildilər. Hava hücumundan müdafiə sistemi məhv edilib, İranın nüvə obyektlərinə zərbələr endirilib, raket proqramına aid müəssisələr vurulub. Hərbi komandanlıq baxımından müxtəlif rəqəmlər deyilir, amma 20-30 faizədək aktiv olan hərbi rəhbərlik məhv edilib. Demək olar ki, İran çox böyük zərbələrə məruz qalıb.”
T.Zülfüqarovun sözlərinə görə, İsrailin Baş naziri Binyamin Netanyahu hərbi əməliyyatların sonadək davam etdirilməsinin tərəfdarıdır və verdiyi bəyanatlar da bunu göstərir:
“İndi bu proseslərin sülh çərçivəsində davam etməsi əlbəttə ki, müsbət haldır. Biz görürük ki, Qərb koalisiyasının və İsrailin üç əsas hədəfi var idi – nüvə proqramı, raket proqramı və bir də rejimin dəyişdirilməsi. Danışıqların da xüsusiyyəti ondadır ki, Tramp dəfələrlə “ultimatum” terminindən istifadə etdi. Yəni müəyyən şərtlər irəli sürürdü. Danışıqlar baş verirsə, deməli, bu məsələlər yenə də Qərb koalisiyasının təzyiqi altında davam edəcək”.
T.Zülfüqarov qeyd edib ki, İran bu prosesdə tək qalıb:
“Biz görürük ki, İranın yanında heç bir müttəfiqi olmayıb. Nə Rusiya, nə də Çin ona kömək edib. Hörmüz boğazının bağlanması ilə bağlı bəyanatlar da bunu təsdiq edir. Bu məsələdə heç kim İranı dəstəkləmədi. Çünki neftin və digər enerji daşıyıcılarının əsas ixrac ünvanı Çindir. Hörmüz boğazını bağlayarkən İran əslində zərbəni Çinə endirirdi.Yəni biz görürük ki, İranın yanında heç kim olmadı. Bu baxımdan indidən demək olar ki, hərbi əməliyyatlarda İran uduzub və ona qarşı təzyiqlər davam edəcək.”
