Avropa Parlamenti Rusiyanın Ukraynada davam edən müharibə cinayətlərini pisləyən qətnamə qəbul edib.
Sənəd iyulun 10-da keçirilən iclasda 507 deputatın lehinə, 77-nin əleyhinə, 45 nəfərin isə bitərəf səs verməsi ilə qəbul olunub.
Qətnamədə qeyd olunur ki, Rusiyanın 2022-ci ilin fevralında başladığı genişmiqyaslı işğal Avropada sülh və sabitliyi pozub, həmçinin qlobal təhlükəsizliyə ciddi zərbə vurub. Rusiya sənəddə “Avropa təhlükəsizliyinə ən ciddi və birbaşa təhdid” kimi təqdim olunur. Avropa parlamentariləri bildirirlər ki, Ukraynaya qarşı aparılan təcavüzkar müharibəyə görə bütün məsuliyyət Rusiyanın üzərindədir. Qətnamədə Rusiya Silahlı Qüvvələri və məmurlarının törətdiyi insan haqlarının pozulması halları, müharibə cinayətləri və beynəlxalq hüququn digər pozuntuları qəti şəkildə pislənilir.
Xüsusi narahatlıq doğuran məqamlar sırasında mülki əhalinin qəsdən hədəfə alınması və Ukraynanın mülki infrastrukturunun sistemli şəkildə məhv edilməsi qeyd olunur. Həmçinin, ukraynalı uşaqların Rusiyaya deportasiyası Kremlin Ukrayna xalqının milli kimliyini məhv etməyə yönəlmiş siyasətinin tərkib hissəsi kimi qiymətləndirilir.
Ukrayna rəsmilərinin məlumatına görə, hazırda təxminən 16 min ukraynalı mülki şəxs Rusiya və onun işğal etdiyi ərazilərdə qanunsuz olaraq saxlanılır. Ümumilikdə isə 70 minə yaxın ukraynalı – uşaq, mülki və hərbçi rəsmi olaraq itkin düşmüş elan edilib.
Qətnamədə Rusiya qüvvələrinin Ukrayna əsirlərini edam etməsi kəskin qınanır və bu cinayətlər Cenevrə Konvensiyasının pozuntusu hesab olunur. Avropa Parlamenti Beynəlxalq Cinayət Məhkəməsinin Rusiya rəsmilərinə qarşı apardığı istintaqları tam dəstəkləyib, habelə Avropa Şurası ilə Ukrayna arasında Rusiyanın təcavüz cinayətinə görə xüsusi tribunalın yaradılması barədə razılaşmanı alqışlayıb.
Deputatlar Ukraynada hərbi cinayətlərə görə bütün məsul şəxslərin cəzalandırılmasını tələb edir, Rusiya tərəfini isə “hamı hamıya” prinsipi ilə əsir mübadiləsinə dərhal razılıq verməyə çağırırlar.
Qətnamədə Avropa İttifaqı və onun müttəfiqlərinin Rusiyanın aqressiyasının dayandırılması və davamlı atəşkəsin təmin olunması üçün daha effektiv hərbi, iqtisadi, siyasi və diplomatik addımlar atmasının vacibliyi vurğulanır.
Avropa deputatları, həmçinin, dondurulmuş Rusiya dövlət aktivlərinin Ukraynanın xeyrinə müsadirəsi prosesinin sürətləndirilməsinə çağırıb. Onlar bildiriblər ki, bu istiqamətdə hüquqi mexanizmlər artıq mövcuddur və prosesin yubadılması Avropa hökumətləri üçün “bağışlanmaz siyasi uğursuzluq” olacaq./azpolitika.info
