Avqustun 10-da Danimarka, Estoniya, Finlandiya, İslandiya, Latviya, Litva, Norveç və İsveçin dövlət və hökumət başçıları Ukrayna-Rusiya müharibəsinə dair birgə bəyanat yayıblar.
Sənəddə vurğulanır ki, müharibənin dayandırılması istiqamətində danışıqlar yalnız atəşkəs şərti ilə mümkün ola bilər və “heç bir qərar Ukraynanın iştirakı olmadan qəbul edilməməlidir”. Liderlər Ukraynanın suverenliyi, müstəqilliyi və ərazi bütövlüyünə “sarsılmaz dəstək” ifadə ediblər.
Bəyanatda həmçinin qeyd olunur ki, ABŞ-ın müharibəyə son qoymaq təşəbbüsü alqışlansa da, həm Ukrayna, həm də Avropa danışıqlar prosesinin birbaşa iştirakçısı olmalıdır: “Ukrayna xalqı öz taleyini azad şəkildə müəyyən etmək hüququna malikdir. Ukraynanın səsi olmadan sülh yolu tapıla bilməz. Ukraynasız Ukrayna barədə, Avropasız Avropa barədə qərar olmayacaq”.
Şimal və Baltik ölkələri Ukraynaya maliyyə və hərbi dəstəyin davam etdiriləcəyini, həmçinin Rusiyaya qarşı “məhdudlaşdırıcı tədbirlərin” qorunub saxlanacağını və gücləndiriləcəyini bildiriblər.
