“O, bombalama kampaniyasını iyrənc şəkildə gücləndirdi”
Rusiya ilə əldə olunan razılaşmalara və Rusiya başçısının verdiyi sözlərə etibar etməyin yersiz olduğunu deyəsən, ABŞ-nin indiki administrasiyasında daha yaxşı anlamağa başlayırlar. Bunu ABŞ-nin Maliyyə naziri Skott Bessentin son açıqalmalarından da görmək olar.
Bessent “Fox News”-a müsahibəsində Vladimir Putini vədinə əməl etməməkdə günahlandırıb. Nazirin dediyinə görə, Putin Alyaskadakı görüşdən sonra Ukraynanı atəşə tutmağı gücləndirməklə ABŞ Prezidenti Donald Trampı aldadıb.
Onun sözlərinə görə, Putinin hərəkətləri Trampla Alyaskadakı “tarixi görüşdə” dediyi niyyətlərə uyğun gəlmir: “Putin, Ankoricdəki görüşdə, eləcə də Avropa liderləri və Zelenski Ağ Evdə olarkən aparılan telefon danışığında açıq ifadə etdiyinin sonradan tam əksini etdi. Faktiki olaraq, o, (Ukraynanı)bombalama kampaniyasını iyrənc bir şəkildə gücləndirdi”.
Nazirin açıqlamasından belə aydın olur ki, nəjayət, Putinin bu davranışına və faktiki olaraq Trampı aldatdığına görə, ABŞ Rusiyaya qarşı daha ağır sanksiyalar tətbiq etməyə hazırlaşır. Bununla bağlı Vaşinqton bu həftə Rusiyaya qarşı sanksiyaların bütün mümkün variantlarını nəzərdən keçirir.
Nazir qeyd edib ki, Tramp Moskvaya sanksiya təzyiqi üçün “bütün variantlar”a hazırdır: “Düşünürəm ki, bu həftə onları çox diqqətlə öyrənəcəyik”.
Xatırladaq ki, avqustun 15-də Tramp Alyaskanın Ankoric şəhərində Putinlə zirvə görüşü keçirib və üç saatlıq danışıqlardan “əhəmiyyətli irəliləyiş” əldə edildiyini açıqlayıb. Heç bir konkret rəsmi razılıq əldə olunmasa da, o bildirib ki, indi “hər şey Zelenskidən asılıdır”.
Avqustun 18-də Zelenski müharibənin dayandırılmasını müzakirə etmək üçün Trampla görüşə – Vaşinqtona gəlib. Ukrayna Prezidenti vurğulayıb ki, Kiyev və onun tərəfdaşları eyni dərəcədə bu müharibəni tez və etibarlı şəkildə bitirmək istəyirlər.
Ağ Evdə Avropa liderləri ilə danışıqlardan dərhal sonra Tramp Kremlə zəng edib. Putinlə söhbətdən sonra Tramp bildirib ki, Rusiya və Ukrayna arasında ikitərəfli format, daha sonra isə ABŞ-nin iştirakı ilə üçtərəfli formata keçid təklif olunub.
Lakin Rusiya tərəfi bunu təsdiqləməyib. Əvəzində, avqustun 28-də Kiyevə ağır raket zərbələri endirib. İyirmidən çox insan, o cümlədən uşaqlar, tələbələr, həkimlər və mədəniyyət xadimləri bu terror hücumunun qurbanı olublar. Təkcə Darnitski rayonunda bir beşmərtəbəli binada 23 nəfər həlak olub. Avqustun 31-də isə Tramp artıq Rusiya və Ukrayna liderləri arasında ikitərəfli danışıqların perspektivlərinə şübhə ilə yanaşdığını deyib.
Hələlik görünən odur ki, Putin doğrudan da işğalı, qanlı hərbi cinayətləri davam etdirməklə vaxt uzatmaq və eyni zamanda da Trampın “başını qatmaq” üçün hər dəfə müxtəlif bəhanə və təkliflərlə çıxış edərək, istədiyinə nail olur. Tramp isə bütün bu oyunlarda alət olmağa könüllü şəkildə razılıq verir…
