Sentyabrın 8-dən sonra Heydər Əliyev Beynəlxalq Aeroportu ərazisində adi taksi sifariş etmək olmayacaq.
Azərbaycan Sürücülər Assosiasiyasının rəhbəri Elşad Eldarovun dediyinə görə, taksi xidməti ilə işləyən sürücülər hava limanında sifariş qəbul edə bilməyəcəklər.
Onun sözlərinə görə, sürücülər sərnişinləri hava limanına aparırdılar və geri dönərkən də müştəri götürə bilirdilər. Lakin indi onlar nə hava limanında, nə də girişdəki şlaqbaumun arxasında dayana bilməyəcəklər, çünki orada dayanmaq və saxlamaq qadağandır. Hava limanı ərazisində isə yalnız qırmızı rəngli “London” taksiləri işləyə biləcək.
Sürücülər bildiriblər ki, “Bolt” artıq bu dəyişikliklər barədə onları xəbərdar edib. Onların sözlərinə görə, digər taksi şirkətləri müştəri götürə bilməyəcəyindən indi hava limanından şəhərə gediş ən azı 40-50 manat, hətta daha da baha başa gələcək. Taksi sürücüləri bunu sentyabrın 19-dan 21-dək Bakıda keçiriləcək “Formula 1” Azərbaycan Qran Prisinə turistlərin gəlməsi ilə əlaqələndirirlər və ümid edirlər ki, yarış bitdikdən sonra məhdudiyyətlər aradan qaldırılacaq.
Lakin Heydər Əliyev Beynəlxalq Aeroportundan haqqin.az-a bildirilib ki, hazırda hava limanı “sərnişinlərin rahatlığını və xidmət keyfiyyətini artırmaq məqsədilə taksi xidmətlərinin təkmilləşdirilməsi üzərində işləyir”. Əlavə ediblər ki, “taksilərin hava limanına giriş-çıxışına heç bir məhdudiyyət yoxdur və yeniliklər tətbiq olunduqca ictimaiyyətə rəsmi məlumat veriləcək”.
