Özbəkistan Xarici İşlər Nazirliyi Rusiya Xarici İşlər Nazirliyinə rəsmi nota göndərərək videoda özbək taksi sürücüsünü təhqir edən, onu “rusların qulu” adlandıran şəxsin şəxsiyyətinin müəyyən edilməsini və barəsində qanuni tədbir görülməsini tələb edib.
Bunu Özbəkistan Xarici İşlər Nazirliyinin mətbuat katibi Axror Burxanov avqust ayında geniş ictimai rezonansa səbəb olan insidenti şərh edərkən deyib:“Xüsusilə də avqust ayında geniş ictimai rezonans doğuran hadisə ilə bağlı araşdırma aparılır. Bununla əlaqədar olaraq videogörüntüdə olan şəxsin kimliyinin müəyyən edilməsi və ona qarşı hüquqi tədbir görülməsi məqsədilə Rusiya Xarici İşlər Nazirliyinə rəsmi nota göndərilib. Özbəkistan vətəndaşları harada olduqlarından asılı olmayaraq, dövlətin himayəsindədir”.
Qeyd edək ki, Moskva vilayətində lentə alındığı iddia edilən bu hadisə Özbəkistanda hiddətə səbəb olub. Kadrlarda bir nəfərin taksi sürücüsünə qışqıraraq onu etnik mənsubiyyətinə görə alçaltması əks olunub.
Bu hadisə miqrantlara qarşı ayrı-seçkilik və etnik təzyiqlərin cəmiyyətlərarası gərginliyi artıran amil olduğunu bir daha göstərir. Eyni zamanda son aylar Rusiyada azərbaycanlı iş adamlarının tutulması, diaspor nümayəndələrinə qarşı təzyiqlərin artması, miqrant icmalarının hüquqlarının qorunması məsələsini gündəmə gətirib. Bu hallar göstərir ki, xaricdə yaşayan vətəndaşların hüquqlarının müdafiəsi və etnik ayrı-seçkiliyin qarşısının alınması üçün həm diplomatik, həm də hüquqi tədbirlər zəruridir.
Milli Cəbhə Partiyasının sədr müavini Tural İrfan açıqlamasında bildirib ki, Rusiyada Orta Asiya xalqlarına və Azərbaycan əsilli insanlara qarşı etnik zəmində ayrı-seçkilik hökm sürür. Görünür, bu, dövlət səviyyəsindədir:
“Mərkəzi hakimiyyətin aqressiyası artır və Ukrayna müharibəsində də gərginliyə səbəb olur. Etnik yöndə ayrı-seçkilik halları regionda da vəziyyəti gərginləşdirə bilər. Konkret türk əsilli şəxslərə qarşı da bu aqressiyaya davam edir. Şübhəsiz ki, belə hallar yalnız Rusiyanın nüfuzuna xələl gətirir. Türk birliyindən narahat olan, imperiya siyasəti güdən Rusiya daxildə sanki bu ölkələrə təsir göstərmək, vətəndaşları köləsi kimi təqdim etmək istəyir. Mərkəzi Asiya ölkələrində Rusiya haqda mənfi rəy formalaşır. Sözsüz ki, həmin ölkələrin siyasətinə də bu hallar təsirsiz ötüşməyəcək. Rusiya öz hegemonluğunu Ukraynada irəlilədikcə daha da artırır. Avropa İttifaqı ölkələri yaxında Rusiya barədə ciddi addımlar ata bilər. Rusiyada şovinizm, etnik və dini öndə ayrı-seçkilik artdıqca həm bölgədə, həm də dünyada ciddi narahatlıq yaradacaq ki, bu da beynəlxalq təşkilatların hərəkətə keçməsinə gətirəcək”./sherg.az
