Politoloq Elxan Şahinoğlu Rusiya rəsmilərinin son açıqlamalarını təhlil edərək, Kreml dairələrinin ABŞ-nin vasitəçiliyi ilə əldə olunan 8 avqust razılaşmasına qarşı mövqeyini tənqid edib.
O bildirib ki, Moskvanın diplomatik manevrləri Vaşinqtonda imzalanmış sənədin reallaşmasına əngəl törətmək məqsədi daşıyır və bu prosesdə Kremlin əsas dayağı Ermənistanın radikal müxalifətidir.
Elxan Şahinoğlu bildirib ki, Rusiya rəsmiləri ilk günlər ABŞ Prezidenti Donald Trampın vasitəçiliyi ilə Azərbaycan və Ermənistan liderləri arasında imzalanan 8 avqust müqaviləsinə səbirli yanaşır və bu sənədin əleyhinə çıxış etmirdilər. Bu mövqe Rusiya Prezidenti Vladimir Putinin Trampla Alyaskada planlaşdırılan görüşünə görə idi. Həmin dövrdə Kreml rəhbərliyi Trampın təşəbbüsünü gözdən salacaq addımlardan çəkinirdi.
Politoloq vurğulayıb ki, müqavilənin imzalanmasından bir ay keçməsinə baxmayaraq, artıq rusiyalı rəsmilər, xüsusilə də xarici işlər naziri Sergey Lavrov Vaşinqton razılaşmasına qarşı tənqidi fikirlər səsləndirməyə başlayıblar. Lavrov razılaşmanı Bakı və İrəvanın suveren qərarı kimi dəyərləndirsə də, sənədə iki zəruri “əlavə” edib: birincisi, Rusiya tərəfinin prosesin icrasını yaxından izlədiyi, ikincisi isə sənədə dair ilkin müsbət rəylərin skeptik yanaşmalarla əvəzləndiyidir.
Elxan Şahinoğluna görə, Lavrovun “skeptik rəylər” ifadəsi ilə hədəf aldığı qrup Ermənistanın radikal müxalifətidir. Politoloq qeyd edib ki, bu qüvvələr Kremlin İrəvandakı əsas dayaqlarıdır və məhz onlar Vaşinqton razılaşmasına qarşı ən sərt çıxışlar ediblər.
Sonda Elxan Şahinoğlu xəbərdarlıq edib ki, həm İrəvan, həm də Vaşinqton prosesi sürətləndirməlidir. Onun fikrincə, Zəngəzur dəhlizinin inşası və Azərbaycanla sülh müqaviləsinin imzalanması təxirə salınmamalıdır. Çünki gecikmə Kremlin maraqlarına xidmət edir./azpolitika.info
