Paytaxtda elə primitiv özbaşınalıqlar olur ki, “bişmiş toyuğun da gülməyi gəlir”. Belələrinə isə “Yol əhvalatı” filmində deyildiyi kimi, nə ad vermək olar – qrabitel, tüfeyli…
Ancaq anlamırlar ki, nə polis, nə prokurorluq, nə məhkəmə onların əlində oyuncaq deyil. Hər nə qədər şahın qanun olmasını istəsələr də, qanun qalibdir və günahkarın cəzasını verir.
Bu ölkədə nazir də həbs edilib, MTN generalı da, icra başçısı da. Çünki dövlət var, qanunun aliliyi var, ədalət var. Belədə isə şəxsin kimliyi, vəzifəsi əhəmiyyət daşımır. Əgər cinayət varsa, cəzası da var.
Məsələn, elə götürək Bakı şəhəri, Yasamal rayonu, A.M.Şərifzadə 192, 1.Talıblı 24 a, 26 və 28 saylı ünvanlarda sakinlərin müraciətini. Onlar Prezident Administrasiyasının rəhbəri Samir Nuriyevə, Dövlət Şəhərsalma və Arxitektura Komitəsinin sədri Anar Quliyevə, Daxili İşlər naziri Vilayət Eyvazova və diər qurumlara üz tutublar.
Rubrika.Az-a daxil olan müraciətdə “Smartdom” MMC tikinti şirkəti tərəfindən sakinlərin hüquqlarının kobud şəkildə pozulmasının qarşısının alınmasında dövlət orqanlarının yardım etmələri xahiş olunur. Yəni görün vəziyyət hansı həddə çatıb ki, “Smartdom” MMC adlı şirkət belə özünü ağa sayır. Amma qanunun və dövlətin gücünü hesablamır.
Sakinlər isə qanuna və dövlətə güvənir. Ona görə ölkənin siyasi və hüquq-mühafizə orqanları rəhbərlərinə müraciət ediblər.
Müraciətdə bildirilir ki, həyət daxilində “Smartdom” MMC tərəfindən aparılan tikinti işləri günün müxtəlif saatlarında və hətta gecə saatlarından başlayaraq səhərədək davam edən yüksək səsli vibrasiyalı qazıntı işləri aparılmasından narazılıq doğurur. Həmçinin sakinlər ağır tonlaqlı yük maşınlarının səs-küyündən mənzillərində rahat otura bilmirlər. Ağır yükqaldıran kranın hərəkəti göstərilən ünvanda yaşayan sakinləri ciddi şəkildə narahat edir. Bu barədə DİN-in “102” və FHN-nin “112” qaynar xəttinə dəfələrlə məlumat verilib, amma tədbir görülməyib.
Sakinlərin Rubrika.Az-a müraciəti əsasında təqdim edilən materiallarla tanış olmuşuq, göstərilən ərazidə redaksiyanın əməkdaşları olub və bəzi qanun pozuntularına şahidlik ediblər.
Təqdim edilən sənədlərdən bəlli olub ki, Bakı şəhər icra başçısı Eldar Əzizov tərəfindən Yasamal rayonu, A.M.Şərifzadə 192, 1.Talıblı 24 a, 26 və 28 saylı ünvanlarda şəhərin və ərazinin ümumi görünüşünə xələl gətirən köhnə tipli tikililərin yerləşdiyi 1,74 ha torpaq sahəsi həmin tikililərin istifadəçiləri (mülkiyyətçiləri) ilə mülki münasibətlərin müvafiq qanunvericiliyin tələblərinə uyğun qarşılıqlı razılıq əsasında “Smartdom” MMC tərəfindən tənzimlənməsi şərti ilə müasir tipli yeni yaşayış binaların və qeyri-yaşayış sahələrinin inşası üçün icarə əsasında “Smartdom” MMC-nin istifadəsinə verilməsinə dair 21.04.2020-ci il tarixli, 80 nömrəli sərəncam veribmiş.
Sərəncamda göstərilən Tapşırığın 1.1.-ci bəndinə əsasən, “Smartdom” MMC sahəni qəbul etməli və onun sanitar vəziyyətinə riayət etməli, 2.3.-cü bəndinə əsasən, sahənin qanunsuz zəbt olunmasının qarşısını almalı və mövcud yaşıllıqların qorunub saxlanmasını təmin etməlidir.
Yerində araşdırma aparılarkən sakinlərin çoxlu sayda ağacların “Smartdom” MMC tərəfindən məhv edildiyi barədə Bakı Şəhər İcra Hakimiyyətinin Başçısına və Ekologiya və Təbii Sərvətlər Nazirliyinə şikayət etdiklərini və həmin nazirliyin nümayəndələri tərəfindən yerə baxış keçirilib, araşdırma nəticəsində perimetr boyunca hasara alınmış ərazinin daxilində müxtəlif diametrli, cinsi ağac və kolların ağır texnikalar vasitəsilə kökündən çıxarılaraq məhv olunduğu müəyyən edilib.
Faktla bağlı akt tərtib edilib, yaşıllığa dəymiş ziyan hesablanıb, təbiətə dəymiş ziyanın məbləği cinayət tərkibi yaratdığından məsələyə hüquqi qiymət verilməsi məqsədilə toplanmış materialların hüquq-mühafizə orqanlarına göndərilməsi üçün hazırlanıb. BŞİH-dən gələn cavabda isə bildirilib ki, sözügedən ünvanda ağacların kütləvi məhv edilməsi ilə bağlı araşdırma aparılır. Mövsümdə yeni ağaclar əkiləcəyi söz verilib. Lakin indiyədək heç bir iş görülməyib.
Sakinlərin bildirdiyinə görə, 2018-ci ildə Leyla xanım Əliyevanın təşəbbüsü ilə abadlaşdırılmış həyət “Smartdom” MMC tərəfindən 2021-ci ildən başlayaraq məhv edilir, uşaqlar üçün nəzərdə tutulmuş yeganə idman və əyləncə meydançası isə 2025-ci ilin martında, bayram günlərində sakinlərin gözü qarşısında dağıdılıb.
Sakinlərin müraciətində sual edilir ki, “Smartdom” MMC-nin tikdiyi binalardan kənar ərazidə, həyətin ortasında yaşıllıqların kütləvi məhv edilməsindən, uşaq futbol meydançasının ləğv edilməsindən, sakinlərin söhbətgahlarının sökülməsindən sonra həmin ərazidə layihədə qeyd edilməyən yeraltı avtomobil dayanacağının tikintisinə komitə tərəfindən icazə verilirmi?
Daha bir tutarlı sorğuda bildirilir ki, tikinti məqsədləri üçün torpaq sahəsi ayırarkən həmin torpaq sahəsində həyata keçirilməsi nəzərdə tutulan tikinti niyyətinin müvafiq ərazinin şəhərsalma sənədlərinə (qüvvədə olan müfəssəl plana, tikintiyə icazə verilməsinin mümkünlüyünün Azərbaycan Respublikasının Şəhərsalma və Tikinti Məcəlləsinin 11-ci maddəsinə, o cümlədən ərazilərin zonalaşdırılması, tikintinin növü və miqyası ilə bağlı müfəssəl qaydalara və yaşayış məntəqələrində yanası sahələrdə tikinti aparılmasının əsas şərtlərinə) uyğunluğuna dair rəy verilmədirmi?
“Smartdom” MMC-dən yeraltı dayanacağın tikintisinə icra hakimiyyətindən (?) icazə verildiyi bildirilir. Bu icazənin Dövlət Şəhərsalma və Arxitektura Komitəsinə məlumat verilib- verilmədiyindən, dəqiqləşdirə bilmədiyimiz hansı icra hakimiyyəti (?) tərəfindən verilməsi bizə aydın deyil.
“Smartdom” MMC-nin rəhbərliyinə ünvanlanan müraciətdə isə deyilir ki, sərəncamda göstərilən Tapşırığın 1.1.-ci bəndinə əsasən, “Smartdom” MMC sahəni qəbul etməli və onun sanitar vəziyyətinə riayət etməli, 2.3.-cü bəndinə əsasən, sahənin qanunsuz zəbt olunmasının qarşısını almalı və mövcud yaşıllıqların qorunub saxlanmasını təmin etməlidir.
Vaxtilə “Abad həyət”in “Bərbad həyət”ə çevrilməsinə, hər gün gecə 00.00-dan səhər 07.00-dək, istirahət və bayram günlərində, ətraf mühitə və insan sağlamlığına mənfi təsir göstərən yüksək vibrasiya və səs-küy yaratmaqla apardığınız qazıntı tikinti işləriniz hansı ünvəncirlə tənzimlənir? Bu sakinlərin istirahət hüquqlarının pozulması demək deyilmi? Binaların əhatəsində, 10-30 metrlik məsafədə quraşdırılmış ağır kranın hərəkət zamanı binanın hansına birinin üzərinə düşməsi, sakinlərin və xüsusən də uşaqların təhlükəsiz şəraitdə yaşaması sakinlərin təhlükəsizliyinin pozulması deyilmi? Sakinlərə avtomobillərinin saxlanması üçün hansı qanuna əsasən pul tələb olunur?
Bütün bu suallar cavabsız qalıb və sakinlər dövlət qurumlarından və Leyla xanımdan dəstək gözləyir./rubrika.az
