ABŞ Prezidenti Donald Tramp Rusiya əleyhinə yeni sanksiyalar məsələsinə münasibət bildirərkən Avropa İttifaqına faktiki olaraq “yerinə yetirilməsi mümkünsüz” şərtlər irəli sürüb. The New York Times yazır ki, Tramp yalnız o halda Moskvaya qarşı məhdudiyyətlərin sərtləşdirilməsini dəstəkləyəcək ki, bütün NATO ölkələri eyni addımı atsın və tamamilə Rusiya neftindən imtina etsinlər.
Bundan başqa, ABŞ lideri Avropa ölkələrini Çin mallarına 50–100 faiz gömrük rüsumu tətbiq etməyə çağırıb. Analitiklər bu tələbi Avropa üçün nə iqtisadi, nə də siyasi baxımdan real sayırlar. Qəzetin qeyd etdiyi kimi, Macarıstan və Türkiyə hələ də Rusiya neftinin iri alıcılarıdır və Trampın şərtlərinin qəbul edilməsi mümkün görünmür.
Son illərdə Avropada Rusiya yanacağından asılılıq azalsa da, qaz sahəsində hələ də ciddi asılılıq qalır ki, bu da Trampın tələblərinin icrasını daha da çətinləşdirir.
Axios portalının məlumatına görə, Tramp özü də Putinə ciddi təzyiq göstərə biləcəyinə şübhə ilə yanaşır və bu məsələdə tərəddüd içindədir.
Digər tərəfdən, ABŞ Konqresində Rusiyaya qarşı sanksiyaların tətbiqinə maraq artır. Nümayəndələr Palatasının spikeri Mayk Conson CBS-ə müsahibəsində bildirib: “Çətin dövrlərdə çətin addımlar lazımdır. Düşünürəm ki, Rusiyaya qarşı sanksiyaların vaxtı çoxdan çatıb. Konqresdə bu istiqamətdə böyük maraq var və biz Ağ Ev, həmçinin Senatla əməkdaşlığa hazırıq”.
Conson qeyd edib ki, Konqres bu məsələdə müstəqil qərar qəbul edə bilmir, çünki qanunun qüvvəyə minməsi üçün prezidentin imzası vacibdir.
Beləliklə, Trampın irəli sürdüyü şərtlər Avropa üçün faktiki olaraq qeyri-mümkündür. Rusiya enerji resurslarından tam imtina real deyil, Çinlə ticarət müharibəsi isə Avropa iqtisadiyyatı üçün ciddi risklər yarada bilər. Konqresdə Moskvanı cəzalandırmaq istəyən qüvvələr mövcud olsa da, son qərar yenə də Trampın əlindədir. /azpolitika.info
