Türkiyə Prezidenti Rəcəb Tayyib Ərdoğan bu gün Ağ Evdə ABŞ Prezidenti Donald Tramp ilə bir araya gələcək.
Rəsmi gündəmdə “Boeing” sərnişin təyyarələrinin satışı, F-16 müqaviləsi və F-35 proqramı ilə bağlı müzakirələr yer alır. Bundan başqa, Suriya və Qəzza məsələlərinin də masaya qoyulacağı gözlənilir.
Mətbuatda yayılan məlumatlara görə, Əskişəhərdəki Beylikova yataqlarında kəşf edilən nadir torpaq elementləri də iki liderin gündəminə daxil ola bilər.
Türkiyənin əsas istəklərindən biri F-35 proqramına geri dönüş yolunun açılmasıdır. Xatırladaq ki, Ankara 2017-ci ildə Rusiyadan S-400 sistemi aldığına görə CAATSA sanksiyalarına məruz qalmış və istehsalçılarından biri olduğu F-35 proqramından çıxarılmışdı.
Daha sonra Türkiyə 40 ədəd F-16 Blok 70 almaq üçün ABŞ-yə 1,4 milyard dollar ödəyib. İndi isə əlavə F-16 sifarişlərinin gündəmdə olduğu, hətta F-35 ilə bağlı irəliləyiş əldə olunarsa, mövcud sifarişlərin F-35-lərə çevrilə biləcəyi ehtimalı irəli sürülür.
Lakin ekspertlər S-400-lər Türkiyədə qaldıqca F-35-lərin verilməyəcəyini bildirirlər. ABŞ səfirinin müsbət açıqlamalarına baxmayaraq, Dövlət Departamenti bu məsələdə mövqenin dəyişmədiyini açıqlayıb. Üstəlik, F-35-lərə sahib olan İsrail və Yunanıstan da Türkiyənin bu qırıcıları əldə etməsini istəmir.
Görüşdə “Boeing” sərnişin təyyarələrinin satışı da əsas gündəm mövzularından olacaq. Türk Hava Yolları rəhbəri Ahmet Bolat ABŞ ilə 250 təyyarəlik müqavilənin gündəmdə olduğunu açıqlayıb.
Hər iki liderin mesajlarında yer almasa da, Suriya məsələsinin müzakirə olunacağına şübhə yoxdur. Ankara PYD/YPG qüvvələrinin silahı buraxaraq Suriya ordusuna qatılmasını istəyir. ABŞ-nin isə bu məsələdə qeyri-müəyyən mövqeyi var. Analitiklər Tramp-Ərdoğan görüşündə bu mövzuda ciddi müzakirələrin aparılacağını istisna etmirlər.
Qəzza məsələsində isə ortaq nöqtə tapmaq daha çətin görünür. ABŞ-nin İsrail yönümlü siyasətində yaxın gələcəkdə dəyişiklik gözlənilmir. /azpolitika.info
