Ukrayna, ABŞ və Avropa arasında davam edən məsləhətləşmələr fonunda Ukrayna Prezidenti Volodimir Zelenskinin Rusiya ilə sülh danışıqlarının perspektivlərinə dair qiymətləndirmələri xeyli ehtiyatlı olub.
“The New York Times”ın yazdığına görə, Kiyev Moskvanın hər hansı razılaşmadan imtina edəcəyi senarisinə getdikdə daha çox hazırlaşır.
Cəmi bir neçə gün əvvəl Zelenski sülh sazişinin “90% hazır” olduğunu bildirsə də, indi o, tərəqqinin faktiki olaraq dayandığını və Rusiyanın mövqeyinin qeyri-müəyyən qaldığını qeyd edir.
“Mən bəlkə işə yarayacaq deyə ümid edərək daha yarım il gözləmək istəmirəm və gözləməyəcəyəm. İki yol var: birincisi — müharibənin dayandırılması, ikincisi — Rusiyanın mənfi addımlarına hazırlaşmaq”, — deyə Zelenski Kiyevdə jurnalistlərə bildirib.
Prezident vurğulayıb ki, Ukrayna eyni zamanda həm danışıqlar aparır, həm də müharibənin davamına hazırlaşır, çünki Moskva artıq Ukraynanın təkliflərinin bir hissəsini rədd edib.
Bu fonda bu gün, 6 yanvar çərşənbə axşamı Parisdə Avropa liderlərinin sammiti keçirilməlidir. Görüş mümkün atəşkəsdən sonra Ukrayna üçün təhlükəsizlik zəmanətlərinə həsr olunub. Lakin ABŞ Dövlət katibi Marko Rubionun digər beynəlxalq böhranlar səbəbindən görüşdə iştirakını ləğv etməsi müşahidəçilər tərəfindən danışıqlar prosesini çətinləşdirə biləcək amil kimi qiymətləndirilir.
Zelenski əsas məsələlərin hələ də həll olunmamış qaldığını etiraf edib:
•Ərazi güzəştləri;
•İşğal olunmuş Zaporojye AES üzərində nəzarət;
•Müharibədən sonrakı təhlükəsizlik zəmanətlərinin formatı.
Ukrayna NATO-nun 5-ci maddəsinə bənzər zəmanətlərdə israr edir və mümkün sülhməramlı missiyada Fransa və Böyük Britaniyanın mütləq iştirakını tələb edir. Rusiya isə Ukraynada istənilən NATO qoşunlarının mövcudluğuna qəti şəkildə qarşı çıxır və şərqdə hücum əməliyyatlarını davam etdirir ki, bu da Kiyevin danışıqlar mövqeyini zəiflədir.
Buna baxmayaraq, Zelenski ABŞ-ın rəhbərliyi altında aparılan danışıqlara alternativ olmadığını vurğulayıb:
“Artıq çox iş görülüb və biz insanların əməyinə, vaxtına hörmət etməliyik, çünki Ukraynada hər dəqiqə insanlar əzab çəkir. Məhz buna görə də hesab edirəm ki, alternativ yoxdur”./qaynarinfo.az
