Yanvarın 16-da Bakı Təşəbbüs Qrupunun (BTQ) təşkilatçılığı ilə Azərbaycan paytaxtında ilk dəfə olaraq “Hindistanda siqhlərə və digər milli azlıqlara qarşı irqçilik və zorakılıq: mövcud reallıqlar” mövzusunda keçirilən beynəlxalq konfrans geniş beynəlxalq iştirak və əhəmiyyətli ictimai-siyasi rezonans doğurub.
Bu barədə BTQ məlumat yayıb.
Bildirilib ki, tədbir beynəlxalq media məkanında geniş şəkildə işıqlandırılıb və bir sıra nüfuzlu beynəlxalq və regional media qurumları tədbirlə bağlı analitik və informativ materiallar dərc ediblər.
Xüsusilə Hindistanın “SikhPoliticsNews”, “KhireyaPunjab”, “MediaPunjab”, “BolePunjab” və “QuamieKta” media platformaları, o cümlədən Pakistanın “The Gulf Observer” və “HumEnglish” portalları, Türkiyənin TRT1 televiziya kanalı, eləcə də Gürcüstanda mənzillənən “OC Media” informasiya portalı konfrans barədə ətraflı məlumat yayıb. Sözügedən media qurumları konfrans çərçivəsində səsləndirilən mövqeləri, tarixi faktları və mövcud insan hüquqları vəziyyətini geniş auditoriyaya çatdıraraq tədbirin beynəlxalq əhəmiyyətini ön plana çıxarıb.
Konfrans, eyni zamanda, sosial şəbəkələrdə, xüsusilə Hindistanın etnik və dini azlıqlara qarşı zorakı siyasətindən zərər çəkən və hazırda Kanada, Böyük Britaniya, ABŞ, Avstraliya və digər ölkələrdə yaşayan siqh diaspor icmaları arasında “X” (keçmiş “Twitter”), “Facebook” və digər platformalarda geniş müzakirə edilib. Xaricdə fəaliyyət göstərən bir sıra siqh təşkilatlar Bakı Təşəbbüs Qrupunun paylaşdığı postları yenidən paylaşıb.
Sosial media müzakirələrində, əsasən, “Bakı Təşəbbüs Qrupu siqhlərə qarşı diskriminasiyanı beynəlxalq gündəmə çıxardı”, “Bakıda siqhlərə qarşı zorakılığa həsr olunmuş beynəlxalq konfrans keçirildi”, “Hindistanda azlıqlara qarşı repressiyalar Bakıda beynəlxalq müstəvidə müzakirə olundu” və “Siqhlərin hüquqlarının müdafiəsi üçün yeni qlobal platforma: Bakı Konfransı” və s. bu kimi başlıqlar diqqət çəkib.
Bu başlıqlar altında yüzlərlə paylaşım, repost və şərh edilib, konfransın materialları və çıxışları geniş auditoriyaya çatdırılıb. Tədbir #BakuInitiativeGroup, #SikhRights, #JusticeFor1984 və #HumanRightsInIndia kimi həştəqlərlə sosial mediada trendə çevrilib.
Konfrans Hindistanda etnik və dini azlıqlara qarşı repressiv siyasətin beynəlxalq gündəmə çıxarılması baxımından mühüm addım kimi qiymətləndirilir. Həmçinin BTQ-nin dekolonizasiya, əsarət altında yaşayan xalqların hüquqlarının müdafiəsi sahəsində qlobal müstəvidə artan rolunu bir daha nümayiş etdirir, siqhlərin hüquqlarının müdafiəsi istiqamətində yeni beynəlxalq platformanın yaradılmasında irəliyə doğru ciddi addımdır. Konfrans çərçivəsində səsləndirilən faktlar və məlumatların yaxın aylarda BMT və digər beynəlxalq institutların gündəminə çıxarılması planlaşdırılır.
