ABŞ Prezidenti Donald Tramp Qrenlandiya ilə bağlı mövqeyini dəstəkləməyən Avropa ölkələrinə qarşı tətbiq ediləcəyi elan olunan yeni gömrük rüsumlarının dayandırıldığını açıqlayıb.
Qərb mediası xəbər verir ki, Tramp bu barədə yanvarın 21-i axşam saatlarında İsveçrənin Davos şəhərində NATO-nun baş katibi Mark Rütte ilə görüşündən sonra danışıb. ABŞ Prezidenti bildirib ki, tərəflər Qrenlandiya və ümumilikdə Arktika regionu ilə bağlı gələcək razılaşmanın əsaslarını formalaşdırıblar.
Tramp görüşdən sonra sosial şəbəkə hesablarında yazıb ki, əldə olunan anlaşma ABŞ və NATO üzvü olan bütün ölkələr üçün böyük üstünlük ola bilər: “NATO-nun baş katibi Mark Rütte ilə çox məhsuldar görüşün nəticəsində Qrenlandiya və mahiyyət etibarilə bütün Arktika regionu ilə bağlı gələcək razılaşmanın əsasını formalaşdırdıq. Bu qərar həyata keçirilərsə, ABŞ və bütün NATO ölkələri üçün böyük müsbət nəticələr verəcək. Bu anlayışa əsaslanaraq, fevralın 1-dən qüvvəyə minməli olan rüsumları tətbiq etməyəcəyəm. Hazırda Qrenlandiya kontekstində ABŞ-nin “Qızıl Qübbə” hava hücumundan müdafiə layihəsi ilə bağlı əlavə müzakirələr aparılır və danışıqlar irəlilədikcə bütün məlumatlar açıqlanacaq”.
Bununla belə, Tramp Mark Rütte ilə müzakirə etdiyi Qrenlandiya ilə bağlı planın detalları barədə konkret açıqlama verməyib. Jurnalistlərin suallarını cavablandıran ABŞ Prezidenti yalnız qeyd edib ki, söhbət uzunmüddətli və faktiki olaraq müddətsiz bir razılaşmadan gedir: “Bu, uzunmüddətli razılaşmadır. Mümkün olan ən uzunmüddətli razılaşmadır. Onun vaxt limiti yoxdur. Bu, əbədi olacaq”.
Xatırladaq ki, Tramp yanvarın 17-də Qrenlandiya ilə bağlı mövqeyini dəstəkləməyən Avropa ölkələrinə qarşı sanksiya xarakterli rüsumların tətbiq olunacağını bəyan etmişdi. Onun açıqlamasına görə, fevralın 1-dən etibarən Danimarka, Norveç, İsveç, Fransa, Almaniya, Böyük Britaniya, Niderland və Finlandiyadan ABŞ-yə idxal olunan bütün mallara 10 faiz, iyunun 1-dən isə 25 faizə qədər gömrük rüsumu tətbiq edilməli idi.
Tramp həmin vaxt bildirmişdi ki, bu rüsumlar “Qrenlandiyanın tam və qəti şəkildə satın alınması ilə bağlı razılaşma əldə olunana qədər” qüvvədə qalacaq. /azpolitika.info
