Ermənistanın Baş naziri Nikol Paşinyan Silahlı Qüvvələrin 34-cü ildönümü münasibətilə yayımladığı təbrik mesajında ordunun inkişafını və ölkənin təhlükəsizlik strategiyasını ətraflı şərh edib.
Erməni mediası xəbər verir ki, o, həmçinin KTMT-ni (Kollektiv Təhlükəsizlik Müqaviləsi Təşkilatı) kəskin tənqid edib və keçmiş dövrlərdə Ermənistanın dövlətçiliyini və suverenliyini zəiflətmək məqsədli qərarların mövcud olduğunu bildirib.
Paşinyan vurğulayıb ki, Ermənistan ordusu formalaşmanın çətin dövrlərini geridə qoyub və bu gün hər gün güclənir: “Son illərdə orduda genişmiqyaslı islahatlar aparılıb, çoxlu sayda müasir silah və texnika əldə edilib”. Baş nazir qeyd edib ki, bu texnika həm keyfiyyət, həm də kvant baxımından ordunun tarixində rekord səviyyədədir. Bunun üçün çox böyük maliyyə vəsaiti xərclənib, çünki əldə olunan texnika həm bahalı, həm də kifayət qədər geniş miqyaslıdır.
Paşinyan sual edib: “Niyə bu tədbirlər 2018–2022-ci illərdə aparılmamışdı?” Baş nazir bildirib ki, beynəlxalq tərəfdaşların əksəriyyəti Ermənistanla silah satışında əməkdaşlıqdan imtina edirdi. Bunun əsas səbəbləri: Silahların Ermənistanın beynəlxalq tanınmış sərhədlərindən kənara çıxmayacağından əmin olmamaları; Silahların gizli texniki məlumatlarının KTMT-yə ötürülməməsi.
Paşinyan qeyd edib ki, KTMT üzvləri 2022-ci ilin sentyabrına qədər Ermənistanın təhlükəsizliyini və ərazi bütövlüyünü qorumaq üzrə öhdəliklərini yerinə yetirməkdən imtina ediblər və Ermənistanın artıq ödədiyi yüz milyonlarla dollarlıq silah və texnika tədarükünü təmin etməyiblər. Baş nazir bunu “Ermənistan üçün mövcud ekstenzial təhlükə” adlandırıb və bildirib ki, görünürdü ki, dövlətçiliyi və suverenliyi sıfırlamaq qərarı verilmişdi.
Paşinyan bildirib ki, bu böyük təhlükə iki strateji addımla aradan qaldırılıb: 2022-ci il oktyabrın 6-da Praqada dördtərəfli siyasi razılaşma nəticəsində Ermənistan və Azərbaycan bir-birinin ərazi bütövlüyünü və suverenliyini 1991-ci ilin Almatı Bəyannaməsinə əsasən tanıyıb və KTMT-də Ermənistanın üzvlüyü müvəqqəti dayandırılıb.
Baş nazir vurğulayıb ki, Ermənistan ordusu yalnız beynəlxalq səviyyədə tanınmış 29,743 kv.km ərazinin müdafiəsinə cavabdehdir və bundan kənar digər vəzifələri yoxdur, yalnız sülh missiyalarına qatılmaq mümkündür. O, həmçinin Azərbaycanla sərhədlərin demarkasiyası çərçivəsində işlərin hüquqi baxımdan tamamlandığını və bu məsələnin qanuni yolla həll ediləcəyini qeyd edib.
Paşinyan orduda könüllü sertifikatlaşdırma proqramına da toxunub:
Bu proqram sayəsində hərbi qulluqçuların maaşı 30–100% və daha çox artıb.
Sıravi heyət 700 min dram (1686 dollar) maaş ala bilir, zabitlərin maaşı isə 1–2 milyon dramı və daha çoxu keçə bilər (2410-4820 dollar).
Baş nazir əlavə edib ki, müddətli hərbi xidmət 24 aydan 18 aya endirilib, sərhədlərdə geniş müdafiə işləri aparılıb və ordunun inkişafı dövlətin davamlılığı, suverenliyi və ərazi bütövlüyü üçün əsas şərtdir. Paşinyan bildirib ki, Ermənistan müharibəyə hazırlaşmır, çünki Azərbaycanla arasında sülh mövcuddur. Lakin güclü və müdafiəli ordu dövlətin əsas qoruyucu institutu kimi davamlı inkişaf etdiriləcək.
Baş nazir vurğulayıb: “Güclü orduya sahib olmayan ölkə həmişə hədəf ola bilər. Ermənistan heç vaxt belə olmamalıdır”. /azpolitika.info
