Ağ Evin Hüquq Departamenti noyabr ayında keçiriləcək Konqresə aralıq seçkilərində Demokratların mümkün qələbəsinə hazırlaşmaq üçün administrasiyadakı respublikaçılarla qapalı brifinqlər keçirir.
Bu barədə “The Washington Post” qəzeti administrasiyadakı mənbələrə istinadla məlumat yayıb.
Nəşrin mənbələri bildirib ki, seçkilərdə Respublikaçıların Konqresin ən azı bir palatasına nəzarəti itirməsi ehtimalı yüksəkdir. Nəşrin məlumatına görə, Tramp tərəfdarları bunu mümkün mənfi ssenarilərə hazırlıq kimi qəbul edirlər, çünki administrasiyada Respublikaçılar Partiyasının mövqelərini itirə biləcəyi barədə təsəvvür artır.
Xatırladaq ki, aralıq seçkilər 3 noyabrda keçiriləcək. Həmin seçkilərdə Nümayəndələr Palatasının bütün 435 üzvü iki illik, 33 senator isə altı illik müddətə yenidən seçiləcək. Hazırda Nümayəndələr Palatası və Senat Respublikaçılar tərəfindən idarə olunur (müvafiq olaraq 435 yerdən 219-u və 100 yerdən 53-ü).
Qəzet qeyd edir ki, Donald Trampın reytinqi, xüsusən də İranla müharibə ilə bağlı iqtisadi çətinliklər fonunda azalır. “ABC News” və “Ipsos” tərəfindən aparılan sorğuya görə, hazırda Demokratlar Nümayəndələr Palatasına seçkilərdə Respublikaçıları azı 5 faiz üstələyir. Bəzi müşahidəçilər seçkidən sonra Respublikaçıların təkcə Nümayəndələr Palatası deyil, Senatda da üstünlüyü əldən verəcəyini proqnozlaşdırırlar. /azpolitika.info
