Azərbaycanda taksi sifarişi operatorları vasitəsilə həyata keçirilən taksi xidmətlərinin 1 faiz dərəcə ilə ödəmə mənbəyində vergiyə cəlb edilməsi təklif olunur.
Marja.az xəbər verir ki, bu barədə Dövlət Vergi Xidmətinin 2027-ci ilin büdcə-vergi siyasəti çərçivəsində hazırlanmış dəyişikliklər layihəsinin təqdimatında bildirilir.
Təklif olunan mexanizmə əsasən, sərnişin ödəniş etdikdən sonra taksi sifarişi platforması (operator) vergini tutacaq, büdcəyə köçürəcək və bəyannamə verəcək.
Sürücü isə tutulmalardan sonra qalan məbləği alacaq.
Beləliklə, taksi sifarişi operatorları vasitəsilə həyata keçirilən taksi xidmətlərində verginin ödəmə mənbəyində tutulması nəzərdə tutulur.
“ƏDV GERİ AL” MEXANİZMİ GENİŞLƏNDİRİLİR
Vergi nəzarətinin gücləndirilməsi istiqamətində nəzərdə tutulan digər dəyişiklik “ƏDV geri al” mexanizminin əhatə dairəsinin genişləndirilməsidir. Təklifə əsasən, ƏDV qeydiyyatında olmayan vergi ödəyicilərindən nağdsız qaydada alınan mallar və xidmətlər üzrə ödənişin 0,9 faizinin istehlakçıya geri qaytarılması nəzərdə tutulur. Beləliklə, yeni mexanizm ƏDV ödəyicisi olmayan satıcılardan nağdsız qaydada alınan mallar və xidmətlər üzrə də vəsaitin bir hissəsinin istehlakçıya qaytarılmasını əhatə edəcək.
Dövlət Vergi Xidmətinin təqdimatında yanacaq məhsullarının markalanması ilə bağlı yeni nəzarət mexanizmi də yer alıb. Təklifə əsasən, ölkədə istehsal olunan və idxal edilən yanacaq məhsullarının beynəlxalq təcrübəyə uyğun olaraq markalanması nəzərdə tutulur. Bu məhsulların tədarük, daşınma və satış mərhələlərində zəncirboyu izlənilməsi mexanizminin tətbiqi təklif edilir.
Təqdimatda prosesin aşağıdakı mərhələləri göstərilir:
1. İstehsal və idxal;
2. Tədarük;
3. Daşınma;
4. Satış.
GÖZLƏNİLƏN NƏTİCƏ
Dövlət Vergi Xidməti təqdimatda dəyişikliklərdən gözlənilən nəticə kimi yanacaq məhsullarının satışı, pərakəndə ticarət və taksi xidmətləri sahəsində dövriyyənin tam uçota alınmasını və kölgə dövriyyənin azaldılmasını göstərib.

