Son illərdə Azərbaycana qarşı yönəlmiş məqsədli təzyiq kampaniyaları diqqət çəkir. Qərb dairələrinin məqsədyönlü və planlaşdırılmış şəkildə ölkə daxilində sabitliyi pozmaq, siyasi proseslərə təsir göstərmək və dövlətçiliyə xələl gətirmək cəhdləri müxtəlif formalarla özünü göstərib. Bu cəhdlər özünü fərqli formalarda – vətəndaş cəmiyyəti institutlarının manipulyasiyası, maliyyə vəsaitlərinin qeyri-qanuni dövriyyəsi, xarici media resurslarında aparılan qərəzli kampaniyalar və regionda müxtəlif informasiya təxribatları ilə büruzə verib.
Əvvəlki dövrlərdə vətəndaş cəmiyyəti institutları vasitəsilə ölkədə ictimai rəyə təsir etmək və daxili sabitliyi pozmaq üçün ciddi səylər müşahidə olunub. Xüsusilə, Qərbdən maliyyələşən QHT-lərin bir hissəsi əslində siyasi məqsədlər güdən, müxalifətə bağlı strukturlar kimi fəaliyyət göstəriblər. Bu təşkilatların əsas maliyyə mənbələri isə xarici qrantlar olub və bu vəsaitlərin Azərbaycana daşınması qeyri-qanuni yollarla həyata keçirilib. Həmin dövrdə Qərb mediasında aparılan anti-Azərbaycan təbliğatı da bu fəaliyyətlərin tərkib hissəsi idi.
2000-ci illərin əvvəllərində Azərbaycanın maliyyə sisteminin hələ kifayət qədər möhkəmlənmədiyi dövrdə bəzi Qərb təşkilatları, o cümlədən Milli Demokratiya İnstitutu (National Democratic Institute), ölkədə dövlət çevrilişi planları hazırlayıb. Bu çərçivədə 2005-ci ildə ABŞ Dövlət Departamentinin dəstəyi ilə Azərbaycanda “narıncı inqilab” ssenarisi gerçəkləşdirilməyə çalışılıb. Lakin ölkə rəhbərliyinin çevik və qətiyyətli mövqeyi nəticəsində bu cəhdlərin qarşısı alınıb.
Hazırda Azərbaycan öz maliyyə sisteminə tam nəzarət edir. Xaricdən gələn hər hansı vəsait, xüsusilə də QHT-lərə yönələn qrantlar dövlət qeydiyyatından keçməlidir. Bu, pul qaçaqmalçılığının qarşısını almağa və xarici müdaxilələrin məhdudlaşdırılmasına imkan verir. Lakin Qərb dairələri bundan sonra da müxtəlif yollarla, o cümlədən Gürcüstandan kuryerlər vasitəsilə Azərbaycana vəsait daşımağa cəhd göstəriblər. Bu fəaliyyətlərin əksəriyyəti ifşa olunub və qarşısı alınıb.
Bütün bu cəhdlər boşa çıxdıqdan sonra Qərb mediası Azərbaycana qarşı qərəzli və sistemli informasiya kampaniyasına start verib. Bu kampaniyada məqsəd beynəlxalq arenada Azərbaycanın imicinə zərbə vurmaq olub. Lakin bu cəhdlər də uğursuz alınıb.
Bu baxımdan Prezident Donald Trampın ABŞ-də başladığı islahatlar Azərbaycan tərəfindən ümidverici istiqamət kimi dəyərləndirilib. USAID kimi qurumların korrupsiya bataqlığında olduğu qeyd olunur. “Azadlıq Radiosu”, “Azad Avropa” və “Amerikanın Səsi” kimi media orqanlarının fəaliyyətlərinin dayandırılması bu istiqamətdə atılan ilk addımlar kimi qiymətləndirilir, lakin bu prosesin daha dərinə getməsi gözlənilir.
Eyni zamanda “Human Rights Watch”, “Freedom House”, “Amnesty İnternational”, “Transparency İnternational” kimi təşkilatların Azərbaycana qarşı fəaliyyətləri də diqqət mərkəzindədir. Bu təşkilatların yaratdığı infrastrukturun fəaliyyətsiz hala gətirilməsi üçün səylər davam edir.
Azərbaycan tərəfi bəyan edib ki, ABŞ Prokurorluğuna və hüquq-mühafizə orqanlarına Trampın sələfləri dövründə həyata keçirilən qeyri-qanuni və dağıdıcı fəaliyyətlərlə bağlı bütün məlumatları təqdim etməyə hazırdır.
Beləliklə, Azərbaycan dövləti öz suverenliyini və daxili sabitliyini qorumaq üçün Qərbin müxtəlif dairələrinin müdaxilə cəhdlərinə qarşı ardıcıl və prinsipial mövqe sərgiləyir. Bu mübarizənin əsas məqsədi ölkənin müstəqilliyini qorumaq və gələcək inkişafını təmin etməkdir.
Azərbaycan beynəlxalq tərəfdaşlığa açıq olduğunu dəfələrlə nümayiş etdirib, lakin bu əməkdaşlıq yalnız qarşılıqlı hörmət və suverenliyə riayət prinsipi əsasında qurulmalıdır. Ölkə daxili işlərə müdaxilə cəhdlərini yolverilməz hesab edir. Azərbaycanın xarici siyasət fəlsəfəsi balanslı əməkdaşlıq və qarşılıqlı faydaya əsaslanır, lakin hər bir tərəfdaşlıq əlaqəsi ölkənin daxili sabitliyi və müstəqilliyinə hörmət çərçivəsində inkişaf etməlidir./mill.az
