Son zamanlar ölkəmizdə lisenziyasız fəaliyyət göstərən kosmetoloqlardan şikayətlər çoxalıb. Ümumiyyətlə estetik tibbi müdaxilələri icra edən şəxslər hansı icazələrin almalıdırlar? Kosmetoloqların estetik əməliyyatlar etməsi nə dərəcədə düzgündür?
Tibbi ekspert Adil Qeybulla mövzu ilə bağlı Referans-a açıqlamasında qeyd edib ki, kosmetoloqlar və estetik cərrahlar fərqli ixtisas sahələrinə malik həkimlərdir. Estetik cərrahlar narkoz altında geniş cərrahi əməliyyatlar aparan mütəxəssislərdir. Kosmetoloqlar isə yerli keyləşmə ilə dərialtı müxtəlif maddələrin yeridilməsi, pilinq, qırışların aradan qaldırılması, dərinin cavanlaşdırılması kimi prosedurlar həyata keçirirlər. Bu iki sahə arasında ciddi fərqlər mövcuddur.
Adil Qeybulla onu da diqqətə çatdırıb ki, kosmetoloqların fəaliyyət göstərməsi üçün mütləq şəkildə lisenziyaları olmalıdır. Bu isə yalnız baza tibbi təhsili aldıqdan sonra müvafiq sahə üzrə rezidentura keçməklə mümkündür. Beləliklə, onların hüquqi fəaliyyət əsasları formalaşır. Lakin, həkimin hüquqi bazası olsa belə, fəaliyyəti ilə bağlı hər hansı şikayət yarandıqda məsələ dərhal hüquq-mühafizə orqanlarına yox, əvvəlcə müvafiq komissiya tərəfindən araşdırılmalıdır. Komissiya müəyyən etməlidir ki, burada həkim səhvi varmı, yoxmu. Yalnız bundan sonra məsələyə hüquqi qiymət verilə bilər.
Eskpert vətəndaş şikayətlərinə də münasibət bildirərkən vurğulayıb ki, bəzən pasiyentlərin və xəstələrin gözləntiləri reallıqdan uzaq olur. Məsələn, müəyyən yaşda olan bir şəxs bir prosedura ilə tam dəyişiklik gözləyə bilər. Buna görə də, həkimlər — xüsusilə kosmetoloqlar — əvvəlcədən pasiyentə prosedurun nəticələrini, mərhələlərini və real gözləntiləri aydın şəkildə izah etməlidirlər.
“Qeyd etmək lazımdır ki, bir çox xarici ölkələrdə bu prosesdə psixoloqlar da iştirak edir. Onlar pasiyentlərlə söhbətlər aparır, prosedura ehtiyacın dərəcəsini qiymətləndirirlər. Təəssüf ki, bizdə bu istiqamətdə hələ də ciddi boşluqlar mövcuddur. Bu da müəyyən anlaşılmazlıqlara səbəb olur”, – deyə cavablayıb.
