ABŞ Prezidenti Donald Trampın Yaxın Şərqə səfəri regionda gərginliyi artırıb. Xüsusilə İranın nüvə obyektlərinə mümkün hərbi zərbələr planı və “Fars körfəzi”nin adının dəyişdirilməsi ilə bağlı ideyaları ciddi narahatlıq doğurub.
“Axios” və “The New York Times” yazır ki, Səudiyyə Ərəbistanı, BƏƏ və Qətər rəhbərləri Trampa açıq şəkildə hərbi zərbə planına qarşı olduqlarını bildiriblər. Onların fikrincə, bu cür addım atılarsa, İran ilk növbədə məhz region ölkələrini hədəfə alacaq. Rəhbərlər ABŞ-ı diplomatik razılaşma yolunu seçməyə çağırıblar.
Bu yanaşma 2015-ci il nüvə sazişinə qarşı çıxmalarına baxmayaraq, bu dəfə müharibənin qarşısını almaq istəklərini ortaya qoyur.
Tramp səfər zamanı “Fars körfəzi” adını dəyişərək “Ərəb körfəzi” adlandırmaq niyyətində olsa da, bu ideyadan imtina edib. Körfəz liderləri bu addımın İranla münasibətləri daha da gərginləşdirəcəyini bildiriblər.
Mediada yayılan məlumata görə, işğalçı İsrail rejiminin rəhbəri Binyamin Netanyahu İranın nüvə obyektlərinə qarşı hərbi əməliyyatda israrlıdır və ABŞ-la razılaşmaya skeptik yanaşır. Tramp İsrail baş nazirini danışıqlara şans verməyə çağırsa da, Netanyahu hərbi yoldan imtina etmir.
Tramp bildirib ki, İsrailin zərbələrinə qarşıdır və ABŞ-İran arasında yeni razılaşma əldə olunması ehtimalı yüksəkdir: “Düşünürəm ki, İran razılaşma istəyir. Bu minlərlə insanın həyatını xilas edə bilər”.
Hazırda Oman vasitəçiliyi ilə ABŞ və İran arasında qeyri-birbaşa danışıqlar aparılır. Tramp gələcəkdə birbaşa təmasların da mümkün olduğunu qeyd edib.
Trampın Yaxın Şərqə səfəri bir tərəfdən Vaşinqtonla Tehran arasında razılaşma ümidini gücləndirsə də, digər tərəfdən Körfəz ölkələrinin təhlükəsizlik narahatlıqları və İsrailin hərbi təzyiqləri fonunda bölgədə gərginliyi artırır. Bununla belə Yaxın Şərqdə sülh yalnız diplomatik yollarla mümkündür.
