Rusiya ordusu hazırda Ukrayna ilə müharibəni azı iki il davam etdirməyə imkan verən silah ehtiyatı yığır. Xüsusilə pilotsuz uçuş aparatlar və raket istehsalı sürətlə artır.
Bu barədə Böyük Britaniyanın “The Telegraph” nəşri məlumat yayıb.
Nəşr qeyd edir ki, Votkinskdə yerləşən raket zavodunun genişləndirilməsi və təchizat zəncirinin gücləndirilməsi yaxın vaxtlarda Rusiyaya bir gecədə 1000 raket və PUA ilə Ukrayna şəhərlərini vurmaq imkanı verə bilər.
Məqalədə vurğulanır ki, Vladimir Putin Ukrayna cəmiyyətinin ruhunu sarsıtmaq, Kiyevin hava hücumundan müdafiəsini zəiflətmək və Qərbin Ukraynaya dəstəyini soyutmaq üçün müntəzəm hava hücumlarına bel bağlayır.
Maykl Kofman Rusiya və Ukrayna üzrə aparıcı hərbi analitik qeyd edir ki, Rusiya bilə-bilə yaşayış məntəqələrinə hücum edir, çünki Ukrayna hava hücumundan müdafiəsi əsasən şəhərləri qorumağa üstünlük verir.
Nəşrə danışan Ukrayna kəşfiyyatındakı mənbə bildirib ki, “Patriot” zenit raketlərinin olmaması Kiyev kimi iri şəhərləri rus ballistik raketlərinə qarşı müdafiəsiz qoya bilər.
“Patriot PAC-3 kimi raketləri yalnız ABŞ təmin edə bilər”, – deyə mənbə bildirib.
Ukrayna Təhlükəsizlik və Əməkdaşlıq Mərkəzinin rəhbəri Sergey Kuzan isə bildirib ki, Ukraynanın qabaqcıl hava hücumundan müdafiə sistemi güclü qalsa da, mülki infrastruktur artıq daha həssasdır.
Bununla belə, Ukrayna ordusuna yaxın mənbə bildirib ki, ölkə hazırda mövcud hava hücumundan müdafiə sistemlərindən razıdır və bu il ərzində bu sistemlərin yetərli olacağı düşünülür.
“The Telegraph” yazır ki, Ukrayna hava hücumlarına güclü cavab vermə qabiliyyətini nümayiş etdirib. Buna misal olaraq Rusiyanın dərinliklərindəki hərbi obyektlərə zərbələri və “Pautina” adlı xüsusi əməliyyatı göstərir.
