Ali təhsil müəssisələrinə qəbul imtahanlarının nəticələri açıqlandıqca, qəbul ballarının yüksələcəyi ilə bağlı müzakirələr davam edir.
Son günlər sosial şəbəkələrdə və abituriyent forumlarında geniş şəkildə yayılan bu fikirlər həm valideynləri, həm də abituriyentləri ciddi tərəddüdlər qarşısında qoyub.
Vəziyyətdən istifadə edən bəzi ixtisas seçimi məsləhətçiləri isə “riskli il” ifadəsini əsas gətirərək, xidmət haqlarını 250 manata qədər qaldırıblar. Sosial şəbəkələrdə isə bu durum narahatlıqla qarşılanır.
Bəs bu il balların kəskin qalxması gözlənilirmi ?
Mövzu ilə bağlı açıqlama verən təhsil eksperti Əmrah Həsənli bildirib ki, balların qalxması məsələsi ilə bağlı iddialar əsaslı deyil:
“Son günlər bəzi şəxslər ixtisas seçimi xidmətlərinin qiymətlərini süni şəkildə artıraraq abituriyent və valideynlər arasında “balların ciddi şəkildə qalxacağı” qorxusu yaratmağa çalışırlar. Xidmət haqlarının 250 manata qədər qaldırılması da məhz bu psixoloji narahatlıq üzərindən əsaslandırılır. Bu iddiaların heç bir rəsmi və statistik əsası yoxdur.
Hazırda yalnız II və III ixtisas qrupları üzrə imtahanlar keçirilib. I və IV qrupların imtahanı isə 13 iyul tarixində keçiriləcək. Yəni yekun nəticələr və ümumi mənzərə hələ tam şəkildə ortada deyil. Bu səbəbdən də balların bütün istiqamətlər üzrə kəskin şəkildə qalxacağı iddiası əsassızdır və cəmiyyətdə məqsədli şəkildə çaşqınlıq yaradılır.
Təəssüf ki, bəzi şəxslər “TikTok” kimi platformalarda canlı yayımlar açaraq abituriyentlərə tamamilə yanlış və əsassız məlumatlar ötürürlər. Heç bir əsas olmadan yayılan belə məlumatlara inanmayın”.
Ə.Həsənli qeyd edib ki, balların formalaşmasına bir sıra amillər təsir edir:
“Hər il bəzi ixtisaslarda keçid ballarında dəyişiklik baş verir. Lakin bu, imtahan suallarının çətinliyi, nəticələrin ortalaması, ixtisaslara olan maraq və abituriyentlərin sayına əsasən formalaşır. Bütün qruplarda və ya bütün ixtisaslarda kütləvi ballıq sıçrayış real deyil və bu tip kütləvi qorxu formalaşdırmaq yalnız manipulyasiyadır.
Ən əsası isə budur ki, bu iddialar bəzi şəxslər tərəfindən sırf maddi maraq naminə – xidmət qiymətlərini süni şəkildə artırmaq və ailələri təzyiq altına salmaq üçün istifadə olunur”.
Təhsil eksperti abutiriyent və valideynlərə müraciət edərək bildirib ki, əssasız məlumatlara inanmasınlar:
“Seçim zamanı rəsmi mənbələrə, real nəticələrə və keçmiş illərin statistik göstəricilərinə əsaslanın. Təhsil mövzusu üzərindən insanları qorxuya salmaq həm qeyri-etik, həm də gələcəklə oynamaqdır”.
