ABŞ Prezidenti Donald Tramp Rusiyanın Ukraynaya qarşı davranışından “məyus olduğunu” bildirib, lakin Vladimir Putinlə dialoqa tam nöqtə qoymadığını deyib.
Bu barədə o, BBC-yə verdiyi telefon müsahibəsində danışıb. Müsahibə Trampın Moskvaya sülh üçün verdiyi 50 günlük ultimatumdan bir neçə saat sonra baş tutub.
Jurnalistin “Siz hələ Putinə etibar edirsinizmi?” sualına cavab olaraq Tramp deyib:
“Mən demək olar ki, heç kimə etibar etmirəm.”
Tramp müsahibədə qeyd edib ki, Putinlə telefon danışıqları adətən eyni ssenari üzrə keçir: “Çox gözəl söhbətlərimiz olur. Deyirəm ki, bax, bu dəfə nəyəsə yaxınlaşmışıq. Amma sonra o, yenə Kiyevdə hansısa binanı yerlə yeksan edir.”
ABŞ Prezidenti əlavə edib ki, Putin onunla “çox nəzakətli” tonda danışsa da, bu nəzakət real siyasətdə heç bir nəticə vermir. Rusiya ABŞ-nin sülh təşəbbüslərini qulaqardına vurur, kompromislərə getmir və Ukraynaya qarşı hücumlarını davam etdirir.
Tramp BBC-yə müsahibəsində Putini necə sülh razılaşmasına məcbur edəcəyinə dair konkret detallar açıqlamayıb, sadəcə deyib: “Bu istiqamətdə işləyirik.”
Müsahibənin digər maraqlı məqamlarından biri də Trampın NATO barədə fikirlərini dəyişməsidir. Əvvəllər alyansı “köhnəlmiş” adlandıran ABŞ Prezidenti bu dəfə bildirib ki,
“NATO artıq hesabları ödəyir” və bu onu “daha səmərəli” edir.
Qeyd edək ki, NATO-nun son Haaqa sammitində müttəfiq dövlətlər hərbi xərcləri ÜDM-in 5%-nə qədər artırmağı hədəf olaraq qəbul ediblər. Bu isə Tramp administrasiyasının uzun müddətdir tələb etdiyi göstəricidir.
Tramp vurğulayıb ki, Almaniya, Fransa və İspaniya liderləri onun qərarlarına hörmətlə yanaşır və onun rəhbərliyi altında NATO-nun daha güclü hala gəldiyini qəbul edirlər.
Sonda Tramp kollektiv təhlükəsizlik prinsipini dəstəklədiyini bildirib. Onun sözlərinə görə, bu prinsip “kiçik ölkələrə böyük dövlətlərə qarşı müdafiə imkanı verir.”
