Azərbaycan 2025-ci ilin yanvar-iyun aylarında yeyinti məhsullarının idxalına 1 milyard 279 milyon ABŞ dollarından çox vəsait xərcləyib. Bu, ölkənin ümumi idxalının 11,1 faizini təşkil edir.
Dövlət Gömrük Komitəsinin açıqladığı göstəricilərə görə 2025-ci ilin ilk altı ayında əsas ərzaq məhsullarının idxal həcmlərində və dəyərlərində maraqlı dinamika müşahidə olunur.
Ət məhsulları və süd məmulatları
Bu dövrdə ölkəyə 22 min 396 ton ət idxal olunub və bunun dəyəri 47 milyon 181 min dollar təşkil edib. Hesablamalara görə, 1 kiloqram ətin idxal qiyməti 2 dollar 11 sent (təxminən 3,58 manat) olub.
Süd və qaymaq məhsulları üzrə idxal 8 min 39 ton təşkil edib və 13 milyon 129 min dollar dəyərində qiymətləndirilib. Beləliklə, 1 kiloqram süd məhsulu təxminən 1 dollar 63 sent (təxminən 2,76 manat) qiymətinə başa gəlib.
Kərə yağı və digər süd yağları
Ən yüksək qiymət göstəricisi kərə yağı və digər süd mənşəli yağlar üzrə qeydə alınıb. Bu kateqoriyadan olan idxal həcmi 13 min 555 ton, dəyəri isə 94 milyon 601 min dollar olub. 1 kiloqram məhsul üçün idxal qiyməti təqribən 7 dollar (təxminən 11,86 manat) təşkil edib.
Meyvə, tərəvəz və çay
Azərbaycan bu müddətdə 239 min 278 ton meyvə və tərəvəz idxal edib. İdxal dəyəri 178 milyon 809 min dollar olub. Bu məhsulların kiloqram qiyməti orta hesabla 75 sent (təxminən 1,27 manat) təşkil edib.
Çay idxalı isə 7 min 51 ton olub, bunun dəyəri isə 42 milyon 851 min dollar təşkil edib. Bu kateqoriyada 1 kiloqram çay təxminən 6 dollar 8 sentə (təxminən 10,34 manat) başa gəlib.
Taxıl və digər əsas ərzaq məhsulları
Ən yüksək həcmdə idxal olunan ərzaq məhsulu buğda olub – 602 min 255 ton. Bu məhsul üçün ödənilən məbləğ 130 milyon 661 min dollar təşkil edib. Beləliklə, 1 kiloqram buğda 22 sent (təxminən 0,37 manat) qiyməti ilə idxal olunub.
Bundan əlavə, qarğıdalı idxalı 36 min 854 ton və 13 milyon 941 min dollar, düyü idxalı isə 30 min 693 ton və 29 milyon 43 min dollar səviyyəsində olub. Bu məhsullar üzrə 1 kiloqramın idxal qiyməti müvafiq olaraq 38 sent (təxminən 0,65 manat) və 95 sent (təxminən 1,61 manat) olub.
Bitki və heyvan mənşəli yağlar
Bitki və heyvan mənşəli piylər və yağların idxal göstəriciləri də diqqət çəkir. Belə ki, 77 min 67 ton həcmində məhsul ölkəyə idxal olunub və bunun üçün 119 milyon 50 min dollar vəsait ödənilib. Bu kateqoriyada 1 kiloqram məhsulun idxal qiyməti təxminən 1 dollar 54 sent (təxminən 2,61 manat) təşkil edib./*bakupost.az
