Azərbaycan son illərdə siyasi, diplomatik, hərbi sahələrdə bütün dünyada özündən söz etdirsə də, iqtisadi sahədə durğunluq, hətta geriləmə nəzərə çarpmaqdadır. Bunu beynəlxalq maliyyə institutları da qeyd edirlər.
Beynəlxalq Valyuta Fondunun yeni məlumatlarına görə, Azərbaycan adambaşına düşən ÜDM-in həcminə görə Cənubi Qafqazda sonuncu yerdədir. Bu sahədə neft və qaz kimi heç bir təbii sərvəti olmayan Gürcüstan və Ermənistandan belə geri qalırıq. 2025-ci ildə Azərbaycanda bu rəqəm 7,6 min dollar ikən, Gürcüstanda 9,57 min dollar, Ermənistanda isə 8,86 min dollar olub.
Digər neft-qaz ölkəsi olan Qazaxıstanda bu göstərici 14,77 min dollara yüksəlib. Artıq bu ölkə tarixdə ilk dəfə Rusiyanı (14,26 min dollar) üstələyərək MDB ölkələri arasında birinci yeri tutub. Üçüncü yerdə 13,34 min dollarla Türkmənistan qərarlaşıb.
Bütün postsovet məkanında yalnız Baltikyanı ölkələr Qazaxıstandan yüksəkdir. Onların da arasında Estoniya 32,76 min dollarla liderdir.
Beləliklə, Azərbaycanda adambaşına düşən ÜDM Qazaxıstandakından demək olar iki dəfə azdır. Niyə? Ümumilikdə Azərbaycanın iqtisadi vəziyyətinin ürəkaçan olmamasında sözsüz ki, hökumətin və onun iqtisadi komandasının xüsusi “əməyi” var.
Bu məsələ ilə bağlı iqtisadçı Natiq Cəfərli də paylaşım edib: “Bu ilin, 2025-ci ilin yanvar-iyul aylarında:
– Azərbaycanda ÜDM cəmi 0,9% artıb,
– Gürcüstanda ÜDM 8,6% artıb,
– Ermənistanda ÜDM 5,2% artıb
Adam yanıb-tökülür, Azərbaycan Dövləti və Xalqı möhtəşəm hərbi qələbə qazandı, ölkəmiz ərazi bütövlüyünü və suverenliyini tam bərpa etməyi bacaran yeganə post-sovet respublikasıdır, rəsmi Bakı gözəl diplomatik gedişlərlə məmləkət üçün işlək “təhlükəsizlik çətiri” qurdu. Prezident Əliyev bu günlərdə Vaşinqtonda imzalanan sənədlərin əsas müəllifi, o görüntünün əsas təşkilatçısı kimi böyük işlər gördü – amma, iqtisadiyyatımız ağır duruma düşür.
Hökumətin bacarıqsız iqtisadi komandası iqtisadyyatdakı problemləri görmür, görmək istəmir, ciddi islahatlardan qaçır, nəticədə iqtisadi aktivlik zəifləyir, insanların real gəlirləri azalır, inflyasiya, qiymətlər isə kəskin artır. ÜDM-in 0,9% artımı, əslində ressesiyadır, belə artım olmur, 0,9% inflyasiyanın gətirdiyi multiplikativ effektdir.
Bu Xalq belə iqtisadi mənzərəyə, bu gedişata layiq deyil axı!”
