Ukrayna torpaqlarının Ukraynasız bölüşdürülməsi ehtimalı azalır
Alyaska sammitinə bir gün qalır və bu görüş dünya gündəminin əsas mövzusudur. Bununla yanaşı, onun mümkün nəticələrilə bağlı narahatlıqlar da pik nöqtədədir. Çünki görüşdə xüsusilə Ukrayna ərazilərinin Kiyevin iştirakı olmadan masa üzərinə qoyulacağı və bölüşdürüləcəyi perspektivi ilə bağlı çoxlu iddialar var.
Lakin Qərb mətbuatının yazdığına görə, ötən gün ABŞ Prezidenti Donald Tramp ukraynalı həmkarı Volodimir Zelenskiyə və avropalı müttəfiqlərinə Vladimir Putinlə Ukraynanın bölünməsini müzakirə etməyəcəyini deyib.
“NBC News”-un öz mənbələrinə istinadla verdiyi məlumata görə, Tramp Avropa liderlərinə Putinlə Alyaskada görüşdə yalnız Ukraynada atəşkəsə nail olmaq istədiyini və Rusiya başçısı ilə bununla bağlı danışacağını bildirib. Mənbələr Trampın Avropa liderlərinə Putinlə heç bir torpaq mübadiləsini müzakirə etməyəcəyini söylədiyini qeyd edirlər.
Söhbətin təfərrüatları ilə bağlı məlumat verən avropalı rəsmilərin sözlərinə görə, Tramp və Avropa liderləri real sülh danışıqlarına başlamazdan əvvəl Ukraynada atəşkəs əldə edilməli olduğu barədə razılığa gəliblər.
Adı çəkilməyən Avropa liderlərindən biri bildirib ki, görüşdə Tramp üçün prioritet məsələ sadəcə, atəşkəsə nail olunmasıdır. Digər Avropa lideri isə Ukraynasız Ukrayna ərazisinin müzakirə olunmayacağına əminliyini ifadə edib.
Bununla yanaşı, məlumatda qeyd olunur ki, əksər Avropa liderlərinin fikrincə, Tramp Putinlə görüşünün nəticəsi ilə bağlı nikbin deyil.
Mənbələr əlavə edib ki, liderlər Putin atəşkəsə razılaşmasa, Trampın Rusiyaya qarşı yeni sanksiyalar tətbiq edəcəyinə əmindirlər. Tramp da daxil olmaqla, bütün tərəflər razılaşıblar ki, Ukrayna real sülh danışıqlarına qatılmalı və hansı ərazi güzəştlərinə getməyə hazır olduğuna özü qərar verməlidir.
Qeyd edək ki, Zelenskinin özü də Alyaska görüşündə Ukrayna ərazilərilə bağlı onun iştirakı olmadan əldə edilə biləcək hər hansı razılaşmanı tanımayacaqlarını bəyan edib.
Öz növbəsində Tramp Avropa liderləri ilə telefon danışığını “çox yaxşı” adlandırıb və Putinlə görüşündən sonra Zelenski ilə üçtərəfli görüşün keçirilməsini təklif edib: “Birinci görüşdən daha məhsuldar olacaq ikinci görüşümüz üçün yaxşı şansımız var. Çünki ilkin olaraq, mən harada olduğumuzu və nə etdiyimizi öyrənəcəyəm. Mən bunu demək olar ki, dərhal etmək istərdim və onlar istəsələr, Putin, Zelenski və mənim aramızda tezliklə ikinci görüş keçirəcəyik”.
Tramp həmçinin əlavə edib ki, Putin müharibəni dayandırmağa razı olmasa, Rusiya “ciddi nəticələrlə” üzləşəcək.
Göründüyü kimi, diplomatiya baxımından rəsmi Kiyev üçün vəziyyət daha əvvəl qeyd edildiyi qədər acınacaqlı deyil. Belə ki, Trampın Ukraynanı onun iştirakı olmadan Putinlə bölüşdürəcəyi barədə məlumatlar hələlik təsdiqlənmir. Çünki Trampın bütün gözlənilməz bəyanatları və addımlarına rəğmən, ABŞ Ukraynanın və Avropanın mövqeyi ilə hesablaşmaya bilmir. Həmçinin, ABŞ-nin öz maraqları Ukraynanın Putinin istədiyi şəkildə parçalanmasına və daha da zəiflədilməsinə imkan vermir. /azpolitika.info
