“ABŞ Konqresində irəli sürülmüş “Sülh Aktı” (PEACE Act) qanun layihəsinin əsl məqsədi sülh yox, Azərbaycanın təzyiq altına alınmasıdır”.
Bunu politoloq Fərhad Məmmədov bildirib.
Ekspert qeyd edib ki, 2025-ci il sentyabrın 30-da ABŞ Nümayəndələr Palatasının Xarici Əlaqələr, Hüquq və Maliyyə komitələrində təqdim olunan 5632 saylı bu qanun layihəsi, zahirən sülhü təşviq etsə də, əslində birtərəfli mövqe daşıyır və Ermənistanı müdafiə, Azərbaycanı isə cəzalandırma məqsədi güdür.
“Qanun layihəsi Ermənistan və Azərbaycan arasında əldə ediləcək razılaşmanın pozulması halında yalnız Azərbaycanın cəzalandırılması ssenarisini nəzərdə tutur. Amma Ermənistanın mümkün təcavüzü və ya razılaşmadan birtərəfli çıxması ümumiyyətlə nəzərdən keçirilmir,” – deyə politoloq bildirib.
Fərhad Məmmədovun fikrincə, bu layihənin arxasında erməni lobbisinin strateji planı dayanır: “Erməni lobbisi ABŞ-nin qanunverici hakimiyyətində təsirli olsa da, icraedici hakimiyyətə – yəni administrasiyalara – istədiyi formada təzyiq göstərə bilmədi. Xüsusilə Prezident İlham Əliyevlə keçmiş ABŞ Prezidenti Donald Tramp arasında yaranmış qarşılıqlı rəğbət onların işini çətinləşdirdi. Ona görə də erməni lobbisi taktikasını dəyişərək qanunvericilik sahəsində struktur dəyişikliyə yönəldi”.
F.Məmmədov əlavə edib ki, layihənin adı – “Sülh Aktı” qəsdən seçilib, çünki bu ad altında təqdim olunan sənədə qarşı çıxmaq siyasi cəhətdən “sülhə qarşı çıxmaq” kimi təqdim edilə bilər: “Bu sənəddə guya Azərbaycan və Ermənistanın ərazi bütövlüyünə hörmət göstərilir, Vaşinqton razılaşması alqışlanır. Amma eyni zamanda, Azərbaycanın keçmiş fəaliyyəti qanunverici şəkildə ‘təcavüz’ kimi təqdim olunur və gələcəkdə istənilən administrasiyaya sanksiyalar tətbiq etmək öhdəliyi qoyulur”.
Fərhad Məmmədovun fikrincə, bu qanun layihəsi həm də ABŞ Konqresinin Cənubi Qafqaz siyasətində institutlaşdırılmış rolunu artırmaq məqsədi daşıyır: “Ənənəvi olaraq ABŞ-də xarici siyasət icraedici hakimiyyətin – yəni prezidentin səlahiyyətində olub. Məsələn, 907-ci düzəlişin tətbiqi və ya dondurulması kimi. ‘Sülh Aktı’ isə bu səlahiyyətləri məhdudlaşdıraraq, Konqresin rolunu genişləndirməyə, Azərbaycanla bağlı siyasəti məhdud çərçivəyə salmağa yönəlib”.
Sonda politoloq bildirib ki, bu təşəbbüs erməni lobbisinin uzun illərdir arzuladığı Cənubi Qafqaz üzrə struktur dəyişikliyi yaratmaq məqsədi daşıyır: “Bir sözlə, bu sənədin məqsədi, ABŞ administrasiyalarının gələcəkdə Azərbaycanla bağlı siyasətini çərçivələmək və erməni lobbisinin strateji maraqlarına xidmət etməkdir”. /azpolitika.info
