“Biz stomatoloqlara işin keyfiyyətinin artırılması məqsədilə ciddi islahatlar keçirmələri üçün ciddi xəbərdarlıq etdik”.
Bunu Yeni Robotik Reabilitasiya Mərkəzi və Hematologiya-Sümük İliyi Transplantasiyası Mərkəzinin açılışına dair brifinqdə TƏBİB-in İcraçı direktoru Vüqar Qurbanov deyib.
Onun sözlərinə görə, ilin əvvəlindən bu prosesin təhlillərini həyata keçirilib:
“Və bu, biz tərəfdən verilən bir tələb, duran yerdə boş bir yerdə verilən bir tələb deyildi. Stomatoloqların xidmət səviyyəsi ilə bağlı faktlar var idi. Və biz də o dövrdən bu günə qədər də eyni qayda ilə bütün ölkə üzrə stomatoloqların fəaliyyətini dəyərləndirmişik. Kifayət qədər böyük vaxt keçib və bu müddət ərzində də aşkar elədiyimiz odur ki, ölkədə elə tibb müəssisələrimiz var ki, orada stomatoloqa bir il ərzində bir nəfər belə müraciət eləyir. Yəni vətəndaş bu xidmətdən məmnun deyil. Bizim bildirdiyimiz o siyahıda olacaq stomatoloqlara il ərzində rəsmi olaraq vətəndaşın müraciəti yoxdur”.
Bildirib ki, vacib olan vətəndaşların aldığı tibbi xidmətdən məmnunluğu, aldığı tibbi xidmətin keyfiyyəti, aldığı tibbi xidmətin fəsadlarının olmamasıdır:
“TƏBİB ciddi islahatlar həyata keçirəcək. Və gələcək dövrlərdə də o stomatoloqlarla bağlı, əlbəttə ki, araşdırma gedir. Nəinki stomatoloqlar, ölkədə olan digər həkimlərimizlə bağlı araşdırmalar aparılır. Fəaliyyətləri ilə bağlı son nəticələr bildiriləcək”.
Vurğulayıb ki, regionda bəzi stomatoloqlara artıq ştatların ləğv olunması, fəaliyyət göstərdiyi dörddə bir ştatların ləğv olunması ilə bağlı xəbərdarlıq göndərilib və bu da qanunvericiliyə tam uyğun şəkildə həyata keçirilir.
