“İri müəssisələr ilə müqayisədə KOB subyektləri daha məhdud resurslara malik olur ki, bu da adekvat insan resurslarına olan ehtiyacın qarşılanmasını bir qədər çətinləşdirir”.
Bunu Kiçik və Orta Biznesin İnkişafı Agentliyinin İdarə Heyətinin sədri Orxan Məmmədov Gələcəyin Peşələri Sammitində bildirib.
Onun sözlərinə görə, Azərbaycanda da KOB sektoru məşğulluğun təmin edilməsində əhəmiyyətli paya malikdir və muzdlu işçilərin 44%-i KOB subyektlərində çalışır:
“Qeyd etdiyim bu amillər nəzərə alınmaqla KOB-ların peşə və biznes təlimlərinə cəlb edilməsində bütün maraqlı tərəflərin, xüsusilə də dövlətin iştirakı və dəstəyi vacibdir.
KOBİA olaraq biz də KOB subyektlərinin bilik və bacarıqlara çıxışının artırılması istiqamətində müxtəlif işlər həyata keçiririk. İlk növbədə, bizneslərin təlim və kadr ehtiyaclarının öyrənilməsi və adekvat cavab strategiyasının hazırlanması məqsədilə mütəmadi sorğular həyata keçiririk.
Ötən il ölkə üzrə həyata keçirilmiş sorğunun nəticələri KOB subyektlərinin biznes təlimlərinə marağını göstərib. Belə ki, respondentlərin 40%-ə yaxını ötən bir il ərzində işçilərin təlimlərdə iştirak etdiyini və 85% bu və ya digər səviyyədə təlimlərin effektiv olduğunu bildirib. Rəyi soruşulanların 44%-i təlimlərin şirkət büdcəsi hesabına maliyyləşdirildiyini, 52%-dən çox hissəsi isə pulsuz təlimlərdə iştirak edildiyini qeyd edib.
Sorğunun digər maraqlı nəticələrindən biri peşəkar işçi heyətinin tapılmasında çağırışlar ilə bağlıdır. Bizneslərin 73%-i müvafiq sahədə çətinliklə üzləşdiyini diqqətə çatdırıb”.
Sədr qeyd edib ki, KOBİA tərəfindən KOB subyektlərinin biznes və yumşaq biliklərinin artırılması məqsədilə 2 mühüm infrastruktur vasitəsilə dəstək təmin edilir:
“Bunlar KOB inkişaf mərkəzləri və KOB Model Müəssisədir. Müxtəlif regionlarda 2020-ci ildən fəaliyyət göstərən KOB inkişaf mərkəzlərində pulsuz təlim, məsləhət və mentorluq xidmətləri təmin edilir. Mərkəzlərin təşkil etdiyi müxtəlif təlimlərdən indiyə qədər 60 000 nəfərdən çox sahibkar və biznes fəaliyyətinə başlamaq istəyən şəxslər faydalanıb.
Təlimlərin əlçətanlığını artırmaq məqsədilə “online” platforma yaradılıb və burada 180-dən çox təlim videosu və özünüqiymətləndirmə testi yerləşdirilib.
Dövlət, özəl sektor və universitet əməkdaşlığı çərçivəsində yaradılmış və ötən il istifadəyə verilmiş KOB Model Müəssisə sahibkarlıq subyektlərinin inkişafı üçün “görmə, eşitmə və icraetmə” konsepsiyası əsasında fəaliyyət göstərən, praktiki bilik və təcrübənin birləşdiyi unikal mərkəzdir. 2025-ci ilin ötən dövrü ərzində 1400-ə yaxın sahibkar və istehsalat sahəsində çalışan mütəxəssislər KOB Model Müəssisənin xidmətlərindən istifadə edib.
Müəssisənin məqsədi sahibkarlara öyrəndikləri bilikləri öz müəssisələrində tətbiq edərək məhsuldarlığı artırmağa, xərclərə qənaət etməyə və istehsal prosesindəki itkiləri azaltmağa dəstək olmaqdır.
Müasir peşələrə yiyələnmiş və biznes təlimləri keçmiş şəxslər bizim üçün təkcə KOB-ların işçi qüvvəsinə olan ehtiyacını ödəyən resurslar deyil, eyni zamanda, potensial sahibkarlardır. Biz müxtəlif əhali qrupları arasında biznes düşüncə tərzinin təbliğinə xüsusi diqqət yetirir və dövlət və özəl sektoru təmsil edən tərəfdaşlarımız ilə hədəfli proqramlar həyata keçiririk.
Bu sahədə Dövlət Məşğulluq Agentliyi ilə məhsuldar və faydalı əməkdaşlıq əlaqələri formalaşıb. Gənclərin biznes emalatxanası və Qarabağ KOB-ları kimi layihələr çərçivəsində özünüməşğulluğun təmin edilməsi və yeni mikro bizneslərin yaradılması məqsədilə birgə işlər aparılır”.
