Rusiya ordusu Donetsk vilayətinin inzibati sərhədlərinə çatmaq üçün Ukraynada ən azı daha bir il də döyüşməlidir.
BBC-nin məlumatına görə, bunu NATO-nun adı çəkilməyən yüksək vəzifəli rəsmisi bildirib.
Mənbə deyib ki, “Ən azı bir il müddətində rusların Donetsk vilayətinin qalan hissəsini ələ keçirməsi real olaraq mümkün deyil”. Bu proqnoz Rusiyanın hazırkı irəliləmə sürətinə əsaslanır. Xüsusilə, 95 faizi Rusiya ordusunun nəzarətində olduğu iddia edilən Pokrovskda işğalçılar gündə orta hesabla cəmi 120 metr irəliləyir.
NATO hesab edir ki, artan maliyyə yükünə baxmayaraq, Rusiya 2027-ci ilə qədər hazırkı templə döyüş əməliyyatlarını davam etdirə bilər. Lakin Rusiya ordusu döyüş meydanında ağır itkilər verir – NATO-nun hesablamalarına görə, hər gün təxminən 1100 şəxsi heyət itirilir, ölən və yaralananların ümumi sayı isə hazırda 1,15 milyona yaxınlaşır. BBC-nin NATO-dakı mənbəsi əlavə edib ki, “Putinin sülh prosesində ciddi şəkildə maraqlı olduğuna və ya Ukraynada sülhə gətirib çıxara biləcək hər hansı güzəştə hazır olduğuna dair heç bir əlamət yoxdur”.
Putin daha əvvəl demişdi ki, Rusiya Ukraynadakı hərbi əməliyyatları yalnız Ukrayna ordusu işğal olunmamış ərazilərdən geri çəkildiyi təqdirdə dayandıracaq.
Məlum olduğu kimi, ötən gün Putin Trampın elçilərilə danışıqlar aparıb. “NBC News” mənbələrinin məlumatına görə, Putin 3 məsələ – Donbas məsələsi, Ukrayna Silahlı Qüvvələrinin məhdudlaşdırılması və işğal olunmuş ərazilərin beynəlxalq səviyyədə tanınması ilə bağlı güzəştə getməkdən imtina edib.
İrəliləyiş olmadan başa çatan Moskva danışıqlarından sonra ABŞ Dövlət Katibi Marko Rubio əsas mübahisəli məqamın Donbas ərazisinin 20%-nin Kiyevin nəzarəti altında qalması olduğunu bildirib. Rubio deyib: “Bu, təxminən 30-50 kilometrlik bir ərazidir”. O əlavə edib ki, Rusiya tərəfində müharibəni yalnız Putin bitirə bilər. /azpolitika.info
