Bu ilin yanvar-noyabr aylarında ölkədə 11 milyard 6320,1 milyon manatlıq və ya əvvəlki ilin eyni dövrü ilə müqayisədə 1,6 faiz çox ümumi daxili məhsul istehsal olunub. Dövlət Statistika Komitəsinin açıqladığı götəricilərdə qeyd olunur ki, ÜDM istehsalının 34 faizi sənaye, 10,6 faizi ticarət; nəqliyyat vasitələrinin təmiri, 7,2 faizi nəqliyyat və anbar təsərrüfatı, 6,5 faizi tikinti, 6,4 faizi kənd təsərrüfatı, meşə təsərrüfatı və balıqçılıq, 2,8 faizi turistlərin yerləşdirilməsi və ictimai iaşə, 1,9 faizi informasiya və rabitə sahələrinin, 21,1 faizi digər sahələrin payına düşüb, məhsula və idxala xalis vergilər ÜDM-in 9,5 faizini təşkil edib. İqtisadiyyatın neft-qaz sektorunda əlavə dəyər 1,8 faiz azalıb, qeyri neft-qaz sektorunda isə 3,2 faiz artıb.
Qeyd edilən dövr üçün ÜDM-dəki 1,6% artımın iqtisadiyyata təsirlərini necə izah etmək olar?
İqtisadçı Xalid Kərimli açıqlamasında bildirib ki, bunu ölkədə son illərdəki ən aşağı iqtisadi artım hesab etmək olar:
“Hökumətin ilin əvvəlində açıqladığı proqnozlarında 2025-ci il üçün iqtisadi artım 3.5 faiz idi. Neft sektoru üçün isə 5 faiz civarında artım proqnozlaşdırılırdı. Ümumi fonda isə 3-3.5 faiz iqtisadi artım proqnozlaşdırılırdı. Bu gün isə hökumət özünün proqnozlarından 2 dəfə geri qalır. Verilən proqnozlar tutula bilmədi. Burda ciddi uğursuzluq var. Qeyri neft-qaz sektorunun artımı nəzərdə tutulduğundan aşağı olub, neft-qaz sektorunda isə azalma gözləniləndən daha sürətli olub. Bütün bunlar isə indiki nəticəyə gətirib çıxarıb.
Xalid Kərimli qeyd edib ki, hazırda regionda ən aşağı iqtisadi artım bizdədir:
“Azərbaycanda iqtisadi artım 1.6 faiz olsa da, neft-qaz sektorunda 1.8 faiz azalma, qeyri-neft-qaz sektorunda isə 3.2 fazi artım var. Amma ümumilikdə iqtisadiyyat 1.6 fazi artıb. Lakin bu göstəricilər çox aşağıdır. Hökumət iqtisadi artımı təmin etməkdə çətinlik çəkir. Bu nəticəni ümumiyyətlə qonşu dövlətlərlə də müqayisə etmək mümkün deyil. Hazırda regionda ən aşağı iqtisadi artım nümayiş etdiririk”./qaynarinfo.az
