Rusiya və Ukrayna arasında ABŞ, Avropa İttifaqının iştirakı ilə aparılan sülh təşəbbüslərinin razılaşdırılması “ciddi hərbi dəyişikliklər baş vermədiyi halda həftələr və ya aylar çəkə bilər”.
Bu barədə “The Wall Street Journal” nəşrinə adlarının açıqlanmasını istəməyən Avropa rəsmiləri məlumat verib.
Mənbələrdən biri bildirib ki, Vaşinqton sürətli nəticə görmək istəyir, lakin müzakirə olunan məsələlərin mürəkkəbliyi buna mane olur: “Amerikalıların tez nəticə istədiyini bilirik. Amma mövzular o qədər çətindir ki, sürətli razılaşma real görünmür”.
WSJ-nin ABŞ administrasiyasındakı mənbələri isə Trampın Ukraynanı “əlverişsiz sülhə” məcbur etməsi barədə iddiaları qəti şəkildə təkzib edib. Trampın komandasında olan rəsmilər bildiriblər ki, məqsəd hər iki tərəf üçün qəbul edilə bilən, Ukraynanın suverenliyini qoruyan və uzunmüddətli təhlükəsizliyini təmin edən sazişdir. Bununla belə, mənbələr danışıqlarda hələ də bir sıra çox həssas məsələlərin açıq qaldığını təsdiqləyib:
Ukraynanın Rusiyaya hansısa əraziləri verməsi ehtimalı;
Ukraynanın NATO-ya üzvlüyü;
Dondurulmuş Rusiya aktivlərindən istifadə;
Rusiyanın gələcəkdə müharibəni yenidən başlamayacağına dair təminatlar.
“The Washington Post” isə ABŞ, Aİ və Ukraynadan olan mənbələrə istinadən yazır ki, müzakirə olunan paketdə Kiyevi razı salmaq üçün bir neçə təşviq variantı var. Onlar arasında:
Ukraynanın 2027-ci ildə Avropa İttifaqına qəbul edilməsi;
Təmas xətti boyunca geniş demilitarizasiya zonası yaradılması;
Dondurulmuş Rusiya aktivlərindən azı 100 milyard dolların Ukraynanın bərpasına yönəldilməsi.
Eyni zamanda, ərazi məsələsinin həlli üçün “Koreya ssenarisi” də gündəmdədir – yəni Rusiya tərəfindən işğal edilmiş ərazilərin statusunun rəsmən müəyyən edilməməsi, lakin faktiki olaraq Moskvadan idarə olunmağa davam etməsi.
CNN yazır ki, Avropada Tramp administrasiyasının sonda Ukraynanı və Aİ-ni sülh prosesini “pozmaqda” ittiham edəcəyindən və vasitəçilikdən tam imtina edə biləcəyindən ciddi narahatlıq var. Tramp isə “Politico”ya müsahibəsində bu iddiaları “tam doğru olmayan” kimi dəyərləndirib. O, eyni zamanda Zelenskini ABŞ-nin sülh təşəbbüsünü qəbul etməyə çağırıb və Rusiyanın hazırda cəbhədə üstünlükdə olduğunu bildirib.
Ukrayna Prezidenti Volodimir Zelenski jurnalistlərlə onlayn görüşündə bildirib ki, yaxın saatlarda ABŞ tərəfinə Kiyev və Avropa nümayəndələri arasında razılaşdırılmış yeni sülh təklifləri təqdim ediləcək. Onun sözlərinə görə, danışıqlar çərçivəsində üç əsas sənəd hazırlanır: Sülh planı, təhlükəsizlik zəmanətləri haqqında sənəd, Ukraynanın bərpası üzrə sənəd.
Rusiya Xarici İşlər naziri Sergey Lavrov da Federasiya Şurasındakı çıxışında təsdiqləyib ki, Moskvanın ABŞ ilə sülh təşəbbüsü üzrə müzakirələri davam etdirmək barədə razılığı var. /azpolitika.info
