Gürcüstanın həbsdə olan keçmiş prezidenti Mixail Saakaşvili sosial şəbəkədə yayımladığı geniş açıqlamada hakim “Gürcü Arzusu”nu Azərbaycanla münasibətlərdə gərginliyi qızışdırmaqda və regiondakı əməkdaşlıq proseslərini sabotaj etməkdə ittiham edib.
Saakaşvili qeyd edir ki, eks-deputat Roman Qotsiridze öz açıqlamaları ilə hökumətin mövqeyini dolayı yolla müdafiə edir və guya gərginliyə görə Azərbaycanı günahlandırır. Onun sözlərinə görə, Qotsiridze Gürcüstanın Azərbaycan yük maşınlarına və tranzit yüklərə tətbiq etdiyi tariflərlə bağlı yanlış təsəvvür yaradır:
“Gürcüstan hökuməti Azərbaycandan keçərək Ermənistana daşınan yüklərin 1 kilometr üçün 0,82 dollar tarif qoyub, halbuki Azərbaycanın özündə bu tarif cəmi 0,02 dollardır. Hətta Qulevidə – İvanişvilinin şəxsi maraqlarının qorunduğu yerdə belə dəmir yolu tarifləri Ermənistan istiqamətindən 20 dəfə aşağıdır”, – deyə, o, bildirib.
Saakaşvili bildirir ki, əslində ilk olaraq Azərbaycan Gürcüstan üzərindən Ermənistana yük daşımalarına başlayıb və bu addım Cənubi Qafqazda sülhün möhkəmlənməsi üçün mühüm əsas yaradırdı. Onun fikrincə, Tbilisi bu yüklərə minimum – simvolik tarif tətbiq etməli idi, çünki bu həm Gürcüstanın iqtisadi maraqlarına uyğundur, həm də Rusiyanı narahat edir.
Keçmiş prezident deyir ki, vəziyyət yalnız dəmir yolu tarifləri ilə məhdudlaşmır. Onun sözlərinə görə, Gürcüstan sərhəd-keçid məntəqələrində Azərbaycan yük maşınlarının qarşısı qəddarlıqla alınır, sürücülərdən 1000 dollara qədər rüşvət tələb olunur, razılaşmayanlar isə cərimə meydançalarına yönləndirilir.
“O zaman bunun dəmir yoluna nə dəxli var?” – deyə Saakaşvili vurğulayır.
Saakaşvili iddia edir ki, Ermənistan hökumətindən aldığı məlumata əsasən, Gürcüstanın hazırkı baş naziri İrakli Kobaxidze Ermənistanı şantaj edir: əgər Ermənistan Gürcüstanda fəaliyyət göstərən QHT-lərin işini məhdudlaşdırmasa, erməni yüklərinin tranziti tamamilə dayandırılacaq.
Saakaşvili qeyd edir ki, Azərbaycan tərəfinin Gürcüstana qarşı təzyiq göstərməsi ilə bağlı iddialar absurddur. O xatırladır ki, Gürcüstan üçün hazırda tətbiq olunan aşağı qaz tarifləri onun prezidentliyi dövründə İlham Əliyevlə razılaşdırılıb.
Saakaşvili vurğulayır ki, Cənubi Qafqazda nəqliyyat dəhlizinin tam gücü ilə işləməsi, Azərbaycan-Ermənistan yaxınlaşması və regional əməkdaşlıq yalnız bir mərkəzin – Kremlin maraqlarına ziddir. Onun sözlərinə görə, “Gürcü Arzusu”nun siyasəti də məhz Rusiya maraqlarına uyğun şəkildə regiondakı prosesləri ləngitməyə yönəlib.
Yekunda Saakaşvili bildirir ki, “Gürcü Arzusu” hakimiyyətinin fəaliyyəti Gürcüstan cəmiyyətində artıq tam inamsızlıq yaradıb: “Xalq bu hakimiyyətdən yaxşı heç nə gözləmir – çünki onlar yaxşı heç nə etmirlər və edə bilməzlər. Buna görə də baş verənlərin mahiyyətini anlamaq çətin deyil”. /azpolitika.info
