Vladimir Putinin Ukraynadakı müharibə və sülh planı ilə bağlı son açıqlamaları göstərir ki, Rusiya maksimalist məqsədlərindən əl çəkməyib.
ABŞ Müharibə Tədqiqatları İnstitutunun (ISW) son hesabatında belə deyilir.
Hesabatda qeyd olunur ki, Rusiya Ukrayna üçün real təhlükəsizlik zəmanəti olmayan sülh müqaviləsində maraqlıdır. Bu, ondan ötrüdür ki, Moskva gələcəkdə Ukraynaya qarşı təcavüzü bərpa və davam etdirə bilsin.
Bildirilir ki, Putin 17 dekabr tarixli son çıxışında Rusiyanın Ukraynada daha geniş ərazi işğalı planlarını bir daha təsdiqləyərək, Ukraynanın və Qərbin “müzakirələrdən imtina etməsi halında Rusiyanın “tarixi torpaqlarını hərbi yolla azad edəcəyini” bəyan edib.
Analitiklər vurğulayırlar ki, “Putinin bu açıqlaması, Rusiyanın davam edən təcavüzünə görə məsuliyyəti Rusiyaya deyil, Ukraynaya yükləmək məqsədi daşıyır”.
Putinin açıqlamaları onu da göstərir ki, o, ABŞ-nin təklif etdiyi 28 bəndlik sülh planına əsaslanan sülh müqaviləsindən məmnun qalmayacaq və bu şərtlər altında hərbi əməliyyatların dayandırılmasından sonra da məqsədlərinə çatmağa çalışacaq.
ISW qeyd edir ki, “Kremlin 28 bəndlik planın müəyyən elementlərinə zidd olan açıqlamaları Putinin hətta bu ilkin razılaşmanı da qəbul etmək istəyini şübhə altına alır və Ukrayna üçün etibarlı təhlükəsizlik zəmanətinin istənilən razılaşmanın davamlılığı üçün nə qədər vacib olduğunu nümayiş etdirir”.
Eyni zamanda, Kreml dəfələrlə bu cür zəmanətlər ideyasını açıq şəkildə rədd edib, xüsusən də Ukrayna ərazisində xarici hərbi kontingentlərin mövcudluğuna qəti şəkildə qarşı çıxıb.
ISW hesab edir ki, “Kreml Ukrayna üzərində tam və effektiv nəzarət yaratmaq kimi maksimalist hərbi məqsədinə çatmaq üçün Rusiyanın gələcəkdə Ukraynaya qarşı təcavüzünə şərait yaratmaq məqsədilə təhlükəsizlik zəmanəti olmadan sülh müqaviləsi bağlamağa çalışır”.
Qeyd edək ki, Putin daha öncə dəfələrlə Rusiyanın Ukraynadakı əraziləri ələ keçirmək məqsədlərindən əl çəkməyəcəyini və buna ya diplomatik, ya da hərbi yolla nail olacağını bildirib. Diplomatik yol və Rusiyanın işğalçılıq iştahasının sonu isə hələik görünmür. Deməli, müharibə hələ xeyli müddət davam edəcək. /azpolitika.info
