Almaniyanın “Bild” nəşri Rusiya–Ukrayna müharibəsinin gedişi və Kremlin itkiləri ilə bağlı diqqətçəkən təhlil dərc edib. Nəşrin siyasi icmalçısı Yulian Röpke yazır ki, bütün hərbi və iqtisadi üstünlüklərə baxmayaraq, Rusiya 2025-ci ildə cəbhədə minimal irəliləyiş əldə edib və bunun əvəzində on minlərlə insan itkisi verib.
Röpkenin təhlilinə görə, müharibənin artıq dördüncü ilinə qədəm qoymasına baxmayaraq, Rusiya əvvəlki illərdə olduğu kimi döyüş meydanında ciddi üstünlüklərə malik olub. Belə ki, Kremlin sərəncamında təxminən 1 milyon nəfərlik ordu, həmçinin Çinin dəstəyi ilə 24 saat rejimində işləyən hərbi iqtisadiyyat mövcuddur və bu sistem davamlı şəkildə silah və sursat istehsal edir.
Lakin bu resurslara baxmayaraq, Rusiya 2025-ci il ərzində cəmi 4400 kvadrat kilometr ərazi ələ keçirə bilib ki, bu da Ukraynanın işğal olunmamış ərazilərinin 1 faizindən də azdır.
“Bild” icmalçısı bildirir ki, bu cüzi irəliləyişin qiyməti olduqca ağır olub. Realist qiymətləndirmələrə əsasən, 2025-ci ildə təxminən 100 min Rusiya vətəndaşı həlak olub. Röpke qeyd edir ki, bu hesablamalar nə Rusiya, nə də Ukrayna təbliğatına əsaslanmır.
Onun sözlərinə görə, “Mediazona” nəşrinin apardığı artıq ölüm göstəriciləri üzrə təhlilə əsasən, ilin ortalarına qədər ölənlərin sayı 48 min nəfər təşkil edib və onlardan 22 mininin kimliyi dəqiqləşdirilib. İlin ikinci yarısında isə itkilərin ən azı eyni tempdə davam etdiyi bildirilir. Röpke vurğulayır ki, Rusiyanın hücum əməliyyatlarını intensivləşdirməsi fonunda itkilər daha da artmış ola bilər. Bu səbəbdən təxminən 100 min ölü və 200 min yaralı rus hərbçisi real rəqəm kimi qiymətləndirilir.
Təhlildə qeyd olunur ki, Rusiya hələ də Vladimir Putinin 2022-ci ildə anneksiya etdiyini elan etdiyi dörd Ukrayna regionunu tam nəzarətə götürməkdən uzaqdır. Hazırda Ukrayna Donetsk vilayətində 5700 kvadrat kilometr, Zaporojyedə 5800 kvadrat kilometr, Xerson vilayətində isə 6400 kvadrat kilometr ərazini nəzarətdə saxlayır.
Röpke hesab edir ki, hətta Rusiya 2025-ci ildə olduğu qədər “uğurlu” qalarsa belə, Kremlin bu anneksiya olunmuş əraziləri tam ələ keçirməsi üçün ən azı daha dörd il vaxt lazım olacaq.
“Bild”in siyasi icmalçısı yekunda vurğulayır ki, Rusiyanın Ukraynada “tez qələbə” qazanması üçün yeganə real ümid ABŞ Prezidenti Donald Tramp administrasiyası ilə birgə səylərdir. Onun fikrincə, Moskva Vaşinqtonun Kiyevi strateji əhəmiyyətli ərazilərdən könüllü şəkildə qoşunlarını çıxarmağa məcbur etməsinə ümid edir. /azpolitika.info
