Rusiya ABŞ-nin Venesueladakı hərbi əməliyyatını və Nikolas Maduronun devrilməsini sərt şəkildə pisləyib. Kremlin ritorikası onun Maduro rejimi ilə güclü tərəfdaşlığını və Qərbin hərbi müdaxilələrini pisləmək kimi zamanla sınaqdan keçirilmiş modelini əks etdirir.
“The Telegraph”-da dərc edilən yazıda belə deyilir.
“Lakin bu, Moskva üçün başqa bir üzücü həqiqəti də ortaya qoydu. Maduronun şərəfsiz şəkildə süqutu Rusiyanın beynəlxalq nüfuzuna və Latın Amerikasında təsir gücünə alçaldıcı zərbə vurdu”, – qəzet yazır.
Yazıda qeyd olunur ki, 2015-ci ildə Suriya Prezidenti Bəşər Əsədin tərəfində bu ölkəyə hərbi müdaxiləsindən bəri Rusiya özünü böhran içində olan avtoritar rejimlər üçün etibarlı tərəfdaş kimi təqdim edib. Lakin 2024-cü ilin dekabrında Əsədin devrilməsi və 2025-ci ilin iyununda İran-İsrail müharibəsi zamanı Rusiyanın hərəkətsizliyi bu illüziyanı puç edib. Maduronun sürətli süqutu isə həmin “nüfuzu” tamamilə darmadağın etdi.
Yazıda vurğulanır ki, Kreml təbliğatçıları əvvəllər müntəzəm olaraq Venesueladakı Rusiya hava hücumundan müdafiə sistemlərinin guya ABŞ-nin mümkün təcavüzünün qarşısını aldığı ilə öyünürdülər. Lakin onların proqnozları özünü doğrultmadı. Rusiyanın S-300 və S-400 kompleksləri İsrailin Suriya və İrana hücumlarının qarşısını ala bilmədi. Rusiyanın öz hava məkanına isə mütəmadi olaraq Ukrayna dronları hücum edir. Nəticədə, Rusiya hava hücumundan müdafiə sistemlərinin keyfiyyətinə inam ən aşağı səviyyədədir: “Bu, Rusiyanın müharibədən sonra aparıcı beynəlxalq silah təchizatçısı kimi yenidən ortaya çıxmaq səylərinə mane olur və Moskvanın Hindistan kimi bir vaxtlar etibarlı silah alıcıları üzərində təsirini zəiflədir”.
Qeyd edilir ki, Venesuela Rusiyanın regiondakı təsirinin əsas mərkəzi idi. Rusiyanın enerji nəhəngi “Rosneft” ABŞ-nin Venesuelaya qarşı sanksiyalarından sui-istifadə edib və Maduro rejimi Rusiyanın “kölgə donanması” ilə gizli sövdələşmələr, alış-veriş həyata keçirib.
Qəzet yazır ki, Venesuelanı itirən Rusiyanın regiondakı mövqeyi indi Kuba və Nikaraqua ilə daha zəif tərəfdaşlıqdan asılıdır: “Prezident Donald Tramp Maduronu devirməklə Vladimir Putinə alçaldıcı zərbə vurdu. Bu, Trampın Rusiya diktatorunu Ukraynadakı müharibəyə son qoymağa məcbur etmək cəhdində mühüm bir güc nümayişi idi”.
Sonda qeyd edilir ki, Rusiya ABŞ-nin Venesueladakı əməliyyatını pisləsə də, bu bəyanatlar olduqca formal və standart, Kremlin yüksək vəzifəli rəsmilərinin reaksiyası isə olduqca təmkinli idi. Analitiklər hesab edirlər ki, bu da Kremlin “Trampın xətrinə dəyməmək” istəyindən irəli gəlir. /azpolitika.info
