Bu günlərdə Kremlin əsas təbliğat ruporlarından olan Vladimir Solovyov keçmiş SSRİ respublikalarına qarşı “SVO” keçirməyi tələb edəndə, bunun təsadüfi olmadığı və bu cür tezislərin Kremldən gəldiyi məlum idi. Ötən gün isə eyni üslubda “Putinin filosofu” kimi tanınan, “Rus dünyasdı”nın baş ideoloqlarından biri olan Aleksandr Duqin Rusiyanın qonşu öllkələrlə bağlı gerçək məqsədlərini açıq şəkildə bəyan edib.
“AzPolitika” xəbər verir ki, Aleksandr Duqin çıxdığı canlı efirdə Azərbaycan da daxil olmaqla milli dövlətlərin, ümumiyyətlə, mövcudluğunun dayandırılmalı olduğunu deyib. Hətta onların “keçmişdə qaldığını” iddia edib və öz səviyyəsinə uyğun ifadələrlə təhqir edib. Rusiyaya yaraşan fikirləri müstəqil dövlətlər haqda səsləndirib.
Duqin deyib ki, Orta Asiya və Cənubi Qafqaz ölkələri suveren olmamalıdır. Onun sözlərinə görə, Moskva müstəqil Azərbaycan, Ermənistan, Gürcüstan, Qazaxıstan, Özbəkistan və Qırğızıstanın mövcudluğuna dözməməlidir: “Biz suveren Ermənistan, Azərbaycan, Gürcüstan, Qazaxıstan, Özbəkistan, Tacikistan, Qırğızıstanın mövcudluğunu qəbul edə bilmərik. Bu yeni modeldə heç bir suverenlik mövcud ola bilməz. Vəssalam! Suverenlik bitdi. Milli dövlətlər keçmişdə qaldı, bunlar zibildir… Onlar ya vahid birliyimizin bir hissəsinə çevriləcək, ya da ABŞ və Aİ üçün platsdarm olacaq”.
Beləliklə, tamamilə azğınlaşmış Rusiya təbliğatı açıq şəkildə solovyovların, duqinlərin və digər çirkin təbliğatçılarının dili ilə bütün postsovet məkanını təhdid edir. Kremlin imperiyaçılıq, işğalçılıq niyyətləri artıq getdikcə daha az gizlədilir və əvvəllər “çoxqütblülük” və “dialoq” arxasında gizlədilən əsl niyyətlər ortaya qoyulur.
Kreml Duqin kimilərin dili ilə açıq şəkildə postsovet dövlətlərinin, o cümlədən Azərbaycan dövlətlərinin suverenliyinə qarşı çıxır. Odur ki, bu cür fiqurların bütünlükdə postsovet məkanına münasibətdə aktivləşməsi qətiyyən təsadüfi deyil və onların sinxron şəkildə dedikləri də sadəcə, “şəxsi ideyaları” deyil. Bütün bu açıqlamalar Kremldəki real düşüncənin birbaşa sübutudur. Bu göstərir ki, qonşuların suverenliyi Kremldə hələ də “tarixi səhv” hesab olunur. Belə bəyanatlarla isə həmin ölkələrin cəmiyyətlərinin və dövlətlərinin reaksiyası yoxlanılır.
Bu cür ritorika gərginliyi artırmağa və əks-reaksiyaya səbəb olmağa yönəlmiş daha geniş informasiya strategiyasının bir hissəsi ola bilər.
Məlum olduğu kimi, bundan öncə Ermənistan XİN Solovyovun oxşar bəyanatına görə Rusiya səfirini çağırarq, ona etiraz notası təqdim etmişdi. Ən azından eyni addım Duqinin bu çıxışına görə bütün MDB ölkələri tərəfindən atılmalı, birgə etiraz, iradə nümayiş etdirilməlidir.
Duqinin qonşu millli dövlətləri “zibil” adlandırmasına gəlincə, bu, Rusiyanın özünü həm fiziki, həm də ideoloji baxımdan idarə edənlərin beyninin çoxdan zibillə dolduğunu göstərir. Rusiya dövlət və cəmiyyət olaraq bu gün Ukraynada törətdiyi hərbi cinayətlərlə, qonşularına qarşı yaramaz münasibəti, eləcə də bütün dünyanı nüvə silahı ilə təhdid etməsilə tarixin zibilliyinə atılmağa layiq olduğunu nümayiş etdirir və əsl “zibil”in hansı dövlət olduğunu ortaya qoyur./azpolitika.info
