“Ukrayna hazır olanda Rusiya olmur, Rusiya hazır olanda Ukrayna”
ABŞ Prezidenti Donald Tramp növbəti mübahisəli açıqlamalarla çıxış edib.
Davosa uçmazdan əvvəl jurnalistlərin qarşısına çıxan Tramp hələ də müharibəni bitirməyə hazır olmadıqları üçün Ukrayna və Rusiyadan şikayətlənib.
“Rusiya hazır olanda Ukrayna hazır deyil. Ukrayna hazır olanda Rusiya hazır deyil. Və onlar hər ay 25.000 nəfər itirirlər”, – deyə ABŞ Prezidenti bildirib.
Media daha əvvəl Trampla Ukrayna Prezidenti Volodimir Zelenski arasında Davosda keçiriləcək Dünya İqtisadi Forumu çərçivəsində görüşün təyin edilmədiyini bildirmişdi. Tramp isə Zelenski ilə Davosda görüşəcəyini demişdi, lakin hələlik konkret planların olmadığını qeyd etmişdi. Nəhayət, dünən Tramp Zelenski ilə görüşmək planlarını təsdiqlədi.
Jurnalistlər ABŞ Prezidentindən Qrenlandiya ilə bağlı nə qədər irəli getməyə hazır olduğunu soruşduqda, o, “Bunu öyrənəcəksiniz” cavabını verib.
Qrenlandiya əhalisi ABŞ-nin bir hissəsi olmaq istəmir və bunu ada hökuməti açıq şəkildə bəyan edir. Bununla bağlı suala Tramp belə cavab verib: “Hələ ki, onlarla birbaşa danışmaq imkanım olmayıb. Bu baş verdikdə, əminəm ki, onlar çox sevinəcəklər”.
Xatırladaq ki, Tramp Norveç Baş naziri Jonas Gar Störeyə göndərdiyi məktubda ona Nobel Sülh Mükafatı verilməməsi səbəbindən “artıq yalnız sülh haqqında düşünməyə borclu olmadığını” bildirib. O, həmçinin “ABŞ Qrenlandiya üzərində tam nəzarəti ələ keçirməyincə dünya tamamilə təhlükəsiz olmayacaq” deyə əminliyini bildirib.
Adanın Baş naziri Jens-Frederik Nilsen isə əhalini mümkün hərbi işğala hazırlaşmağa çağıraraq deyib: “Hərbi güc tətbiqi ehtimalı azdır, lakin bunu istisna etmək olmaz.”
Rəy sorğuları göstərir ki, təkcə Qrenlandiya deyil, ABŞ əhalisinin də böyük əksəriyyəti Trampın Qrenlandiyanı ilhaq planının əleyhinədir. /azpolitika.info
