Ukrayna Prezidenti Vladimir Zelenski bildirib ki, Donbas məsələsi əsas məsələdir və onu 23 yanvar tarixində Abu-Dabi şəhərində keçiriləcək görüşdə Kiev, Moskva və Vaşinqton nümayəndələrinin iştirakı ilə müzakirə edəcəklər.
Zelenski jurnalistlərə bildirib: “Donbas məsələsi əsasdır. Bu məsələ müzakirə olunacaq və üç tərəfin baxışına uyğun formada 23-24 yanvar tarixlərində Abu-Dabi şəhərində müzakirə ediləcək”.
Rusiya Prezidentinin köməkçisi Yuri Uşakov isə Kremlə ABŞ Prezidenti Donald Trampın xüsusi elçiləri ilə görüşdən sonra bildirib ki, “Ankoricdə razılaşdırılmış formula üzrə ərazi məsələsi həll olunmadan uzunmüddətli nizamlanmaya ümid etmək olmaz” və əlavə edib ki, bu halda Rusiya müharibəni davam etdirəcək.
Qeyd olunub ki, keçən ilin avqust ayında Ankoricdə ABŞ Prezidenti Donald Trampla görüşdə Vladimir Putin Zaparoje və Xerson ərazilərində döyüş xəttinin dondurulmasına razı olub, lakin Donetsk vilayətinin bütün ərazilərinin Rusiya nəzarətinə verilməsini tələb edib. Bu təklif Kiyev tərəfindən rədd olunub.
Xəbərdə deyilir ki, Rusiya nümayəndə heyətinə Baş Qərargahın Baş İdarəsi (GRU) rəisi admiral İqor Kostyukov rəhbərlik edəcək, Ukrayna nümayəndə heyətinə isə Milli Təhlükəsizlik və Müdafiə Şurasının katibi Rüstəm Ümerov rəhbərlik edəcək. Zelenski qeyd edib ki, danışıqlar texniki səviyyədə keçiriləcək və 23-24 yanvar tarixlərində baş tutacaq. O bildirib: “Ruslar kompromisə hazır olmalıdır. Hər kəs hazır olmalıdır, yalnız Ukrayna deyil. Nəticənin necə olacağını görəcəyik”.
Zelenski həmçinin Trampla Davosda görüş zamanı Ukraynanın hava hücumundan müdafiəsi və təhlükəsizlik təminatları məsələlərinin müzakirə olunduğunu bildirib. O deyib ki, təhlükəsizlik təminatları ilə bağlı sənəd imzalanmağa hazırdır: “Əlbəttə, texniki detallar hələ çoxdur və bu sənədin əsasında əlavə sənədlər də hazırlanacaq. Amma əsas razılaşma təhlükəsizlik təminatları ilə bağlıdır”.
ABŞ Prezidenti görüşdən sonra bildirib ki, görüş “çox yaxşı keçib” və Putinə mesajın müharibənin dayandırılması olduğunu çatdırıb. O qeyd edib ki, Zelenski razılaşma bağlamaq istəyir və “bütün parametrlər məlumdur”. “Financial Times” qəzeti isə yazıb ki, görüş zamanı Zelenski Trampı Ukraynaya əlavə dəstək öhdəliklərini götürməyə inandırmağa çalışıb, lakin bu sənədlərin müzakirəsi başa çatmayıb və imzalanmayıb.
