Son illər Azərbaycanda özəl sektorda çalışanların sayının artması fonunda dövlət sektorunda işçilərin sayında azalma müşahidə olunur. Bu proses ümumi məşğulluq baxımından müsbət tendensiya kimi qiymətləndirilir və əmək bazarında dayanıqlığın formalaşmasına töhfə verir.
Bu sözləri açıqlamasında millət vəkili, iqtisadçı ekspert Vüqar Bayramov dövlət sektorunda işçilərin sayının azalmasının səbəblərindən danışarkən deyib.
“Bütövlükdə muzdlu işçilər arasında özəl sektorun payının artması müsbət məqamdır, çünki iş yerlərinin əsasən özəl sektor hesabına formalaşması məşğulluğun uzunmüddətli dayanıqlığı baxımından mühüm əhəmiyyət daşıyır. Dövlət sektorunda iş yerlərinin azalması bir tərəfdən struktur islahatları, digər tərəfdən isə bəzi dövlət qurumlarında aparılan optimallaşdırma və yenidən təşkiletmə prosesi ilə bağlıdır.
Struktur islahatları çərçivəsində bir-birini təkrarlayan və funksional baxımdan səmərəsiz iş yerlərinin ixtisar edilməsi təbii prosesdir. Eyni zamanda dövlət qurumlarında elektron xidmətlərin genişlənməsi və rəqəmsallaşma səviyyəsinin yüksəlməsi də iş yerlərinin sayına birbaşa təsir göstərir. Bu amillər nəzərə alındıqda dövlət sektorunda işçi sayının azalması əvvəlcədən gözlənilən idi.
Bütün bu proseslərlə paralel olaraq özəl sektorda yeni iş yerlərinin açılması müsbət dinamikanın əsas göstəricisidir və qarşıdakı dövrlərdə məşğulluğun əsasən özəl sektor hesabına təmin olunmasına çalışılmalıdır”, – deputat qeyd edib.
Qeyd edək ki, rəsmi statistikaya əsasən, hazırda Azərbaycanda dövlət sektorunda çalışanların sayı təxminən 869 min nəfərdir. Bu göstərici ötən il 882,8 min nəfər təşkil edirdi ki, nəticədə son bir il ərzində dövlət sektorunda işləyənlərin sayı təxminən 13,8 min nəfər azalıb. Müqayisə üçün bildirək ki, 2020-ci ildə dövlət sektorunda çalışanların sayı təxminən 911 min nəfər olub.
