Azərbaycan ədəbiyyatında ən böyük lirik şairlərdən biri kimi tanın, mütəfəkkir Xaqani Şirvaninin 900 illik yubileyinin qeyd edilməsi haqqında Azərbaycan Respublikası Prezidentinin 28 yanvar 2026-cı il tarixli Sərəncamına uyğun olaraq 13 mart 2026-cı il tarixində Azərbaycan Texniki Universitetində (AzTU) yazıçı Sona İsmayılovanın “Sözün xaqanı” adlı kitabının təqdimatı keçirilib.
Tədbiri universitetin Humanitar fənlər kafedrasının müdiri, filologiya üzrə fəlsəfə doktoru, dosent Həbib Mirzəyev açaraq iştirakçıları salamladı. Sonra torpaqlarımızın azadlığı uğurnda şəhid olanların ruhu bir dəqiqəlik sükutla yad edildi. Həbib müəllim qısa olaraq Əfzələddin Xaqani Şirvaninin yaradıcılığından danışdı və onun yaradıcılığına Türk dünyasında yüksək qiymət verildiyindən, respublika Prezidenti İlham Əliyevin bu il böyük şair və filosofun 900 illik yubileyinin keçirilməsi haqqında sərəncam imzaladığını qeyd etdi. Biz də bu sərəncama uyğun olaraq öz universitetimizdə XII əsrdə yaşamış, kəşmekeşli həyat yolu keçmiş şairin həyat və yaradıcılığından bəhs edən tədbirlər keçiririk. Sona İsmayılovanının Xaqani Şirvaniyə həsr etdiyi “Sözün xaqanı” tarixi romanı bu silsilə tədbirlərdən ilkidir.
Tədbirdə çıxış edənlər AMEA-nın Ədəbiyyat İnstuitutunun əməkdaşları – filologiya elmləri doktoru Lütfiyyə Əsgərzadə və filologiya üzrə fəlsəfə doktoru Aytən Qurbanova, Xızı rayon Giləzi qəsəbə M.Müşfiq adına tam orta məktəbin direktoru, “Tərəqqi” medalı mükafatçısı Svetlana Rüstəmova, “Qızıl Zəngilan” jurnalının təsisçisi və baş redaktoru, yazıçı Tarverdi Abbasov, filologiya üzrə fəlsəfə doktoru Müşfiq Borçalı, araşdırmaçı-yazar Əli Vəliyev, yazıçı Samir Abdullayev, şair Sevda Muradəliyeva, şair Xəzər Hikmətoğlu və digərləri “Sözün xaqanı” romanı haqqında maraqlı fikirlər söylədilər və Sona xanım İsmayılovaya yaradıcılığında uğurlar arzuladılar. Bu əsər oxucularına təkcə tarixi roman kimi deyil, həm də dahi şairin həyatı, yaradıcılığı və yaşadığı dövrün ictimai mühiti bədii dillə təqdim olunması iştirakçılar tərəfindən xüsusilə qeyd olundu. Bildirildi ki, əsər yalnız tarixi hadisələri təsvir etməklə kifayətlənmir, həm də söz sənətinin gücünü, dövrün ictimai düşüncəsini və mənəvi dəyərlərini oxucuya çatdırır.
Tədbirdə Azərbaycan Yazıçılar Birliyinin və Azərbaycan Jurnalistlər Birliyinin üzvü, ASKEF Azərbaycan və Orta Asiya başkanı, bir çox ölkələrin yazıçılar birliklərinin üzvü, çoxlu mükafatlar sahibi, Turan sevdalı Sona xanım İsmayılova çıxış edərək tədbirin təşkilatçılarına, xüsusən də Həbib müəllimə, bütün tədbir iştirakçılarına təşəkkür etdi və bu əsərin ərsəyə gəlməsindən danışdı. Dahi şairin XII əsrdə yaşadığı ərazilərdə, dövlətlərdə olduğunu, 18 gün Təbrizdə yaşadığını, Şamaxıdan Təbrizə kimi şairin keçdiyi maraqlı həyatını birlikdə yaşadığını vurğuladı və roman yazılıb qurtarana kim özünü XII əsrdə olduğunu vurğuladı. Bu roman artıq Türk, Özbək, Gürcü, Qırğız, Qazax dillərinə tərcümə edildiyin və orada da böyük maraq göstərildiyindən danışdı.
Əli Vəliyev AzTU-nun Humanitar fənlər kafedrasına Aşıq Ələsgərin seçilmiş əsərləri, Aşıq Alının seçilmiş əsərləri, XIX əsr İrəvan mətbəxi, Xalq bankın həyata keçirdiyi “Xalq əmanəti” kitabları silsiləsindən çap olunmuş Cənubi Azərbaycan peziyası kitablarını hədiyyə etdi. Sonda xatirə şəkilləri çəkildi.
Əli Vəliyev,
ASKEF Qərbi Azərbaycan təmsilçisi, araşdırmaçı-yazar
Məqaləyə dair fotomateriallar:
